DEAD on arrival sa balay tambalanan ang 12 anyos nga tinun-an human nalumos niadtong Huwebes mga alas 2:30 sa hapon sa lungsod sa Opol, Misamis Oriental.

Giila ang biktima nga mao si Eloisa Enoc, tinun-an sa Grade 6 sa Opol Elementary School.

Updates on President Benigno Aquino III's presidency

Nasayran gikan sa paryente sa biktima nga si Merlinda nga nahinabi sa Sun.Star Superbalita nga nagtungha ang biktima niadtong tungora dihang naaghat nga maligo sa dagat pagkahuman sa paniudto niini uban sa pipila ka mga higala.

Apan nasayran sa inahan niining si Josephine ang pagpakaligo sa biktima sa dagat hinungdan nga giapas kini sa kabalaka nga ma-late na sa klase.

Apan pag-abot sa inahan sa dapit nagkapa-kapa na nga nangayo og tabang ang iyang anak hinungdan nga midagan ug dali nga gilangoy ang nahimutangan sa anak.

Nasayran nga ang inahan sa biktima dili usab makabalo molangoy ug diriyot na usab kini nga malumos hinungdan nga nabuhian ang anak niini.

Nangayo og tabang si Josephine ug nagsinggit apan uwahi na dihang nanglagom na si Eloisa.

Girespondehan sab sa kapolisan sa Opol Police Station ang insidente gidali pagdala sa Northern Mindanao Medical Center (NMMC) ning siyudad sa Cagayan de Oro ang biktima apan dead on arrival nga gideklarar sa doctor.

Giingong nagbasol ang inahan sa biktima sa uwahing pagluwas sa anak apan gibutyag sa mga paryente nga walay angay nga basulon sa insidente. (Stephanie V. Berganio)