NAUKAY ang katawhan sa giingong pag-inom sa mga barangay kapitan daplin sa dalan niadtong nilabayng adlaw sa Macasandig ning siyudad sa Cagayan de Oro.

Gituohang ang hitabo mahimong black propaganda sa umaabot nga barangay election.

Updates on President Benigno Aquino III's presidency

Nasapon sa nagpatrolya nga mga polis gikan sa Police Station 9 (PS9) sa Macasandig ang tulo ka mga kapitan sa nga mao sila si Kapitan Marvin Gontiñas sa Barangay Agusan, Kapitan Alexander dela Cerna sa Brgy. 26, ug Kapitan Noel Ilogon sa Barangay 25.

Gireklamo usab sa pipila ka mga residente ang pagpa-sounds sa mga suspetsado.

Gipaabot ni Police Inspector Ariel Phillip Pontillas hepe sa PS9 atol sa interbyu sa Sun.Star Superbalita nga gibati siya og kahiubos ngadto sa mga kapitan tungod kay wala kini nagtuman sa ordinansa sa siyudad nga mao ang Ordinance no. 5133-95 diin naglatid ang pagdili og inom daplin sa dalan.

Na-insulto usab si Pontillas tungod kay wala usab gihatagan og pagtagad ang iyang pagbadlong ug igo lamang nga nangatawa ang mga kapitan.

Nidumili paghatag sa mga botelya sa ilimnon ang mga kapitan dihang gibawi kini sa kapolisan ug padayon nga nag-inom.

Usa sa tulo ka mga opisyal ang nihulga nga kasohan og carnapping dihang gisusi ang motorisklo nga gipangsakyan niini.

Atol sa maong hitabo wala masayod si Pontillas nga mga kapitan sa barangay ang maong tawo.

Hinuon ang mga alegasyon gitubag sa mga kapitan sa interbyu sa RMN-DXCC.

Si Gontiñas nipasabot nga walay buot ipasabot ang iyang pagkatawa ug giangkon niini nga dili siya pamilyar sa ordinansa sa siyudad apan nangayo kini og despensa sa maong kalapasan.

Samtang si Ilogon nibutyag nga dili lamang ang ilang grupo niadtong tungora ang nag-inom ug gibutyag niini nga igo lang sila nihapit sa maong dapit kay giapas ang higala ni Gontiñas.

Si Dela Cerna usab nipasabot nga wala siya masayod kung kinsa ang nag-inom sa dapit labina nga 15 minutos lamang gikan sa iyang pag-abot sa lugar niabot usab ang mga polis nga nagpatrolya nga polis.

"Ang mga tawo nasayod kung unsay akong accomplishment sa barangay," kini ang tubag ni Dela Cerna sa Sun.Star Superbalita sa pangutana nga posibleng mahimo kini nga propaganda sa umaabot nga piliay. (Stephanie V. Berganio)