Diarrhea outbreak gideklara sa Alabel, GenSan

GENERAL SANTOS CITY -- Gipailawom na sa diarrhea outbreak ang munisipyo sa Alabel human ang paspas nga pagsaka sa ihap sa mga tawong naigo sa diarrhea diin miabot na sa 303 ang nasakit.

Kini ang gikompirma ni Dr. Honorato Fabio, municipal Health Officer, nga paspas ang hitabo nga miresulta sa pagka-ospital sa mga biktima tungod kay misakit ang ilang tiyan, nagsuka, ug nag-LBM.

Matod ni Fabio nga mikuha na sila og sampol sa tubig ug nasuta nga may presensiya sa e-coli bacteria ang tubig nga giinom sa mga biktima.

Sa datus nga gipagawas sa MHO, walo ka mga purok ang naigo sa diarrhea outbreak diin ang labing naigo mao ang Purok Sto. Niño.

Nasayran nga naggikan sa mga kasapaan ug tabay ang tubig nga gi-inom sa mga mulopyo sa walo ka mga purok.

Tungod sa nasinating hulaw sa mi-aging mga bulan, ang pagbaha posibleng nakakontamina sa ilimnong tubig sa mga lumad.

Sa pagkakaron, gi-rekomenda sa MHO sa mga molupyo sa Alabel ug kasikbit nga lugar nga pabukalan una ang tubig una imnon.

“Sa pagkakaron, mihatag na og ayuda ang local nga gobyerno sa mga nabiktima sa outbreak kay sagad mga kabataan ang naigo sa diarrhea,” asoy ni Fabio.

Samtang, di pa makompirma karon sa MHO ang gikatahong pag-igo sa Chikungunya sa 29 ka mga tawo nga namatikdan nga mihubag ang ilahang kalawasan sa Barangay Bagacay sa maong lungsod tungod wala pay gipagulang resulta sa laboratoryo ang mga mananambal nga misuta sa mga pasyente.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph