DUHA ka mga drayber ang gipusil sa wa mailhing mamumuo kinsa sunod-sunod nga miatake sa mga biktima sa duha ka managlahing insidente niadtong Huwebes.
Ang unang insidente nahitabo sa alas 9:00 sa gabii didto sa Stomac Tricycle Terminal sa Center Point Plaza, Matina Crossing samtang ang ikaduha nahitabo sa alas 10:45 sa gabii didto sa Crossing Puan Public Market, siyudad sa Davao.
Unang biktima mao si Jomel Parami, 28, ultiawo, tricycle driver ug nagpuyo sa Kilometro 6, Barangay Matina Pangi, ning siyudad.
Si PO2 Ronald Baguio, duty investigator sa Talomo Police Station, nagbutyag nga ang biktima nagtindog lang sa maong terminal apan kalit siyang giduol sa wa mailhing tawo kinsa nagsul-ob og itom nga jacket.
Matud ni Baguio nga ang maong tawo, sigun sa mga nakasaksi, milanit sa iyang dalang pistola dayon gipusil ang biktima duha ka higayon tumong sa ulo.
Si Parami natumba sa iyang nahimutangan samtang ang killer daling mibiya ug misakay sa nagpaabot nga motorsiklo pipila ka metros gikan sa crime scene.
Mga sakop sa Emergency Medical Services sa Barangay Matina Crossing daling miresponde didto sa crime scene dayon ilang gidala ang biktima didto sa Davao Adventist Hospital sa Bangkal.
Paghiabot sa biktima sa maong tambalanan, gideklara ni Dr. Dexter Daquipa nga patay na siya dihang miabot sa maong tambalanan.
Ikaduhang biktima, suma ni Baguio, mao si Melwin Allado, 25, ulitawo, habal-habal driver ug nagpuyo sa Block 1, Puan, Barangay Talomo Proper.
Si Allado giingon nga naglingkod lamang sa usa ka motorsiklo nga dunay sidecar sa alas 10:45 sa gabii didto sa Crossing Puan apan wa niya nabantayi ang paghiabot sa usa ka tawo nga nagbitbit og .45 kalibre nga pistola.
Ang maong tawo wa naglangan og panahon gipusil niya ang biktima sa likod ug milapos ang bala sa dughan mao nga midagan ang biktima paingon sa ilang balay aron mangayo og panabang.
Tungod kay nakadagan man ang biktima, ang suspek daling misakay sa usa ka Honda Super Big Bike kauban ang usa ka tawo nga nagsilbi nga look out.
Ang biktima gidala sa iyang kabanay didto sa Adventist Hospital apan gibalhin sab dayon didto sa San Pedro Hospital tungod kay grabe ang iyang kahimtang.
Si Police Chief Inspector Joselito Loriza, hepe sa Talomo Police Station, nagmando na sa iyang mga sakop nga palawman ang imbestigasyon aron masayran ang motibo, mailhan ug masikop ang mga suspetsado.