ANG kagamhanang probinsiyal sa Davao del Norte buot nga ihatag sa pribado ang pagdumala sa tulo ka mga district hospital sa nahisgutang lalawigan.
Sumala pa ni Governor Rodolfo del Rosario atol sa Kapihan sa Kapitolyo nga buot nilang pribadong sektor na ang magdumala sa Samal District Hospital, Kapalong District Hospital, ug Carmen Ditrict Hospital nga pulos nahimutang sa nahisgutang lalawigan aron mas mapalambo pa ang pagpadagan sa maong hospital.
"I want to privatize our hospital, not my intension to do business but to ensure the better delivery of health care to our people," sulti ni del Rosario.
Matud ni del Rosario nga ang maong tumong subay kini sa kampanya sa kagamhanang probinsiya nga private public partnership luyo sa giduso ni Presidente Benigno Aquino III.
Hinuon, gipasalig ni del Rosario nga ang mga molupyong lumad ug kabus sa lalawigan sa Davao del Norte puwede gihapon nga makapatambal sa maong mga hospital nga libre tungod mang-apod-paod sab og Philhealth card ang kagamhanan alang ngadto kanila.
Ang lalawigan sa Davao del Norte migasto og kapin P60-milyones matag tuig alang sa pagpadagan sa maong tulo ka hospital.
Gisulti ni del Rosario nga ugaling pribadong sektor na ang magdumala sa maong hospital ang pundo nga gigahin alang niini mopadulong sa pagpalambo sa tanang mga Municipal ug City Health Office, lakip mga Barangay Health Center sa tibuok probinsiya.
Hinuon, ang nahisgutang plano iagi pa sab sa kagamhanan sa usa ka public consultation aron masayran ang pagtugot sa katawhan.
Dili na sab kinahanglan pa ang legislasyon gikan sa Kongreso sanglit probinsiya man ang nanag-iya sa nahisgutang hospital.
"No need for legislation since this three hospitals belong to the province," dugang ni del Rosario.
Bugtong resolusyon lamang gikan sa mga sakop sa Sanguniang Panlalawigan sa Davao del Norte ang kinahanglan aron madayon ang maong plano. (Marvin Pineda)