ANG Armed Forces of the Philippines nagbutyag nga dunay siyam ka mga lugar sa Mindanao gihimong combat training sa gatusan ka mga miyembro sa Moro Islamic Liberation Front (MILF).

Kini human nga gitug-an sa liderato sa MILF nga padayon silang nagpakusog sa ilang puwersa bisan pa sa gitakdang panghinabing pangkalinaw sa Mindanao.

Updates on President Benigno Aquino III's presidency

Basi sa taho sa militar, migawas nga nangandam ang MILF sa halapad nga pagpangatake kon ugaling subling mapakyas ang negosasyon tali sa kagamhanan.

Matud sa militar nga dunay usa ka dapit diin gihimo ang combat training sa 230 ka MILF. Kini gitawag nga Camp Palestine sa Butig, Lanao del Sur.

Bag-uhay sab nga nahuman ang usa ka bulan nga intelligence-gathering training sa 247 ka MILF nga nagbansay-bansay sa Rigid Jungle Warfare didto sa Tawi-Tawi.

Samtang basi sa intelligence report sa militar nga nangrekrut sab ang mga rebelde og bag-ong mga mujahidden sa probinsiya sa Maguindanao, Sultan Kudarat, North Cotabato, Lanao del Sur, Tawi-Tawi, Basilan, Jolo Sulu ug Lanao del Norte.

Duna say laing grupo sa MILF nga nalambigit sa pagpangidnap ug pangikil aron makatigom og kuwarta nga ipalit og bag-ong armas, apil na mga bala nga magamit nila sa ilang pagpakigbisog.

Apan ang maong taho gipanghimakak ni MILF Military Spokesman Von Alhaq ug nagkanayon nga kabahin lang kini sa black propaganda sa militar aron nga dauton ang liderato sa MILF. (Edgardo Fuerzas)