SIGURADO na nga madayon ang piliay alang sa mga opisyal sa barangay ug Sangguniang Kabataan (SK) karong Oktubre 25.

Si Presidenti Noynoy Aquino miuyon na nga ipadayon ang gitakdang piliay tungod kay dili niya buot nga lugwayan pa ang termino sa karong mga opisyal, gawas nga buot usab niya mahatagan og kagawasan ang katawhan sa pagpili sa bag-ong mga opisyal.

Updates on President Benigno Aquino III's presidency

Sayo niini, adunay mga opisyal sama pananglit ni Vice President Jejomar Binay nga nagsugyot nga dili idayon ang piliay o kaha papha-on na lamang ang barangay elections aron makadaginot ang kagamhanan og salapi.

Ang baruganan nila ni Aquino ug Binay niining isyuha managlahi. Buot ni Aquino nga idungan na lamang ang eleksiyon sa barangay ug SK sa piliay sa nasyonal ug lokal sa 2013 aron nga makatipig ang gobyerno og salapi.

Kun madayon ang maong sugyot, putlan og lima ka buwan ang termino sa mga opisyal nga modaug unya sa Oktubre nga maapektahan sa kausaban tungod sa nasudnong piliay unya sa Mayo.

Apan tumong usab sa Malacanang karon nga wagtangon na ang SK council ug magbatun na lamang og usa ka representanti sa SK sugod sa piliay sa Oktubre 25.

Mokantidad sa 800 milyones ang matipig sa gobyerno kun ang eleksiyon dunganon.

Ang piliay karong Oktubre madayon tungod kay sumala sa Palasyo nga duna nay gigahin nga badyet alang niini. Maayo nga madayon ang piliay tungod kay aron mapulihan kadtong mga opisyal sa barangay ang angay na gyud pulihan kay nagpabadlong.