UNSAY kalainan kun ang pag-inspection sa mga kargamento himuon sud sa propedad nga gipanagiyahan sa Bureau of Customs ug sa pribadong luna?

Mao kini ang mitumaw nga pangutana human ang daghang mga shippers naghangyo nga diha lamang sud sa customs zone himuon ang paghiling sa ilang mga kargamento tungod kay dili na sila mahasol gawas nga dili modako ang ilang galastuhan.

Bahin sa isyu nga smuggling, ang smuggling mahitabo bisan diing lugara. Ang kinahanglan lang dinhi mao ang hugot ug tinouray nga paghiling sa mga kargamento. Kini nga tahas mahimo kaayo sa Bureau of Customs ubos karon sa maayong liderato ni Abogado Anju Nereo Castigador.

Atong mahinumdoman nga kaniadto samtang ang paghiling sa mga kargamento didto pa gihimo sa usa ka pribadong luna ubay-ubay ang mga shippers namalhin ngadto sa dakbayan sa General Santos. Ang ilang rason midako ang ilang galastuhan. Apan dihang gibalhin na ang pag-inspection sa mga kargamento diha sa customs zone subling namalik ang mga shippers.

Apil sa gireklamo sa mga importers ug mga brokers mao ang bayranan sa forklift nga nag-diskarga ug nagkarga sa mga van sa pribadong inspection area. Gawas niini, wa ug dili sila tugotan nga magdala sa ilang kargamento lulan sa ilang mga hauling trucks gikan sa daplin sa barko padung sa inspection area nga nahimutang tabuk sa national highway.

Gawas niini, tungod sa kadaghan sa mga kargamento sa Davao Port dili na makasugakod ang gamay og luna nga pribadong container yard ug kinahanglan na ang dakong espasyo nga mahanyag lamang sa BOC.

Angay masulbad na kining butanga alang sa kaayohan sa mga shippers nga nagbayad og tukmang buhis sa kagamhanan ug dili sa pipila lang ka tawo nga sila ra usab ang nabulahan sa ilang kita.

----

Divorce bill

Dunay usa ka magtiayon nga nagbuwag og kapin na sa 20 ka tuig. Ang babaye naminyo apan wa makasal sa iyang kapuyo tungod kay ang tanikala sa kaminyuon wa pa man nawagtang tali sa una niyang bana kinsa aduna na usay laing kapuyo.

Dugay na plano nila nga sulbaron ang ilang problema pinaagi sa annulment apan dili sila makasugakod sa dakong galastuhan.

Ang ingon niini nga sitwasyon unsay maayong solosyon aron mahatagan og kagawasan ang matag usa?

Sa pagkakaron gibuhi didto sa kongreso ang Divorce bill nga gipasiugdahan niadto ni Gabriela party-list Congresswoman Liza Maza.

Apan sama sa nahitabo kaniadto, daghan na usab ang gilaumang mobabag sa balaudnon. Unta, tun-an og maayo sa mga supak ang ilang baruganan. Di na mapugos ang magtiayon nga mag-ipon og puyo kun nagkasabot na sila nga di na gyud magkasinabut.