DILI lalim kon tamparuson o dagmalan ta’g tawo nga wa ta kahibawo og unsay atong sala ilabi na og tinarong ang atong katuyoan.

Mao kini nahitabo sa reporter nga si Lesley Caminade sa niaging pipila na ka adlaw kinsa, matod pa, igo lang nangutana ni Sr. Inspector Vicente Velasquez kon unsay iyang mahagdaw nga balita apan gitubag hinuon kini og tamparos.

Updates on President Benigno Aquino III's presidency

Si Velasquez nga masabot nato nga aboredo ang utok niadtong higayona tungod kay lagi apil sila sa mga biktima sa sunog sa F. Villa Street, diretsong misakay sa iyang motorsiklo human makaigo sa babayeng reporter.

Pagkaluoy ni Caminade. Kahibulong ug katingala maoy mibanos sa iyang alimpatakan.

Unsay iyang sala?

Ang ka aboredo sa utok sa tawo wa magpasabot nga maghatag na kini kaniya og katungod o lisensiya sa pagdagmal o bisan unsa nga gusto na lang niyang buhaton ngadto sa iyang isig kaingon.

Ang pagkuha og balita maoy trabaho sa usa ka reporter ug ang pagpakisayod o kaha ang pag-interview sa iyang tinubdan mao na gyud ang sagad nang naandan.

Kon way respeto si Velasquez ngadto sa mga media nga mao unta ang tigpadangat ug tigpahibawo sa mga panghitabo ngadto sa publiko, respetohan lang unta niya ang pagkababaye usab ni Caminade.

Makamao unta usab siya motan-aw sa kahuyang sa usa ka babaye.

Apan kini iyang gibaliwala. Ang kalagot maoy mipatugbabaw.

Bisan pa man tuod og nangayo na’g pasaylo si Velazquez ngadto ni Caminade apan dugang lakang o imbestigasyon ang angayng himuon.

Kay tingali baya ug ang pasaylo mao lay iyang perming gihimong ikyasanan aron siya sa kaso di mapasakaan.

Lisod na sab ug kini mahimong sumbanan sa uban. Panaogdaog ug hudlat ngadto sa mga media. Kini among gikondenar.