MGA sakop sa Crips gang namusil sa mga barangay tanod nga nagpatrolya, kanila nakuhaan og armas human masikop atol sa ginukdanay sa miaging gabii gikan sa P. Del Rosario corner Junquera hangtod na sa R.R Landon ug D. Jakosalem sts., dakbayan sa Sugbo.

Atol sa pagpamusil, wa maigo ang mga barangay tanod kay nag-ikis-ikis sila sa pagdagan samtang sila gipusil dihang ilang gigukod ang mga suspek.

Updates on President Benigno Aquino III's presidency

Ang nadakpan giilang mao si Argel John Manangquil, 18, taga Cogon Ramos, sakop sa Crips.

Siya nakuhaan og usa ka kalibre .38 nga revolver uban sa mga bala ug duha ka mga kabhang.

Si SPO1 Wilfredo Arevalo sa Presento Uno kun Parian police station nagkanayon nga nagpatrolya sila si barangay tanod Sonny Calomarde ug Tomas Arganda sa dihang nakadawat sila og taho nga may nagpaboto og armas nga mga batan-on.

Ilang nasigpatan ang grupo ni Manangquil hinungdan nga ila kining gisundan, apan nakabantay ang grupo hangtod nga nag-iyahay kini og dagan.

Gigukod kini sa duha ka mga barangay tanod sa Kamagayan, apan sila gipamusil.

Si Manangquil naapsan sa mga barangay tanod hangtod nga ilang nasikop.

Niabot ang mga sakop sa Mobile Patrol ug gibalhog sa bilanggoan sa Presento Uno ang suspek.

Samtang tukmang kaso ang gikatakda nga ipasaka batok sa suspek.(JFT)