LAING biktima sa pagpamusil sa dakbayan sa Lapu-Lapu niila sa usa sa mga ni-ambush sa magpapatigayong si Debbie Yu sa dakbayan sa Mandaue nga maoy nipusil kaniya niadtong Hunyo 28 ning tuiga.

Ang biktima nibutyag nga sa wa pa siya gipusil, nagkalalis usab sila sa giingong mastermind sa ambush ni Yu nga si Marites Velasco.

Updates on President Benigno Aquino III's presidency

Si Sr. Supt. Noel Gillamac nibutyag nga niadtong Hunyo 28 sa gabii usa ka usa ka 54 anyos nga babaye (ngan gipugngan) gipusil.

Ang biktima giingong padulong na matulog sa dihang dunay nituktok sa ilang balay.

Sa dihang nigawas siya aron pagsusi, gipusil siya sa wa mailhing tawo hinungdan sa pagkaigo sa iyang dughan apan luwas na sa makuyaw nga kahimtang.

Matod ni Gillamac nga ang biktima nga nakakita sa telebisyon kang Aldrin Montecalbo, gitumbok nga gunman ni Yu, positibo nga niila nga maoy nipusil kaniya. Laing nasikop sa mga pulis gawas kang Montecalbo ug Velasco, mao sila si Orbel Inihao, John Joy Palo-Palo ug Rodilito Buenaventura.

Dugang nasayran sa kapulisan nga sa wa gipusil ang biktima, ila usab nga nasayran nga gikalalis kini ni Velasco tungod kay nakautang usab sa lending firm niiini.

Si Velasco maoy giingong mastermind sa pag-ambush ni Yu ug sa namatay niining driver nga si Sonny Boy Mahilum.

Niingon si Gillamac nga dugang unyang kaso ang atubangon sa mga suspek kon makit-an na personal sa biktima ang mga gikatahapan.

Si Gillamac nagtuo nga daghan pa unya ang mogawas nga mga biktima sa ilang nadakpan nga suspek di lang sa Lapu-Lapu kon di lakip na sa dakbayan sa Sugbo. Ang lima ka mga suspek gitanggong sa Mandaue City Jail human gibasura sa korte ang gisang-at nga writ of habeas corpus sa ilang mga abogado. (DRT)