AMAHAN nga nanglugos sa iyang duha ka mga anak babaye dul-an sulod sa walo ka mga tuig nadakpan sa mga sakop sa Criminal Investigation and Detection Group (CIDG-7) niadtong miaging gabii sa balay niini sa Brgy. Dos, lungsod sa Tuburan, Sugbo.
Si Luis (tinuod nga ngan gipugngan), 50, panday, kanhi binilanggo sa Cebu Provincial Detention and Rehabilitation Center (CPDRC) gitanggong sa karsel sa CIDG-7 human nireklamo ang iyang kanhi kapuyo nga ang ilang duha ka mga anak nga babaye nga nagpangidaron og 17 ug 12 gi-among-amungan.
Si Supt. Ritchie Posadas, deputy regional director sa CIDG-7, nagkanayon nga niadtong miaging hapon nidangop sa ilang buhatan ang inahan sa mga biktima uban sa mga sakop sa Crusade Against Violence hinungdan nga ilang gidakop ang suspek.
Sumala pa ni Posadas nga ang duha ka mga biktima niadto pang 2002 gisugdan pag-among-among sa ilang amahan dihang nagpangidaron pa lang ang maguwang og 8-9 anyos niadtong higayuna.
Ang katapusang pagpanglugos nahitabo niadtong Agusto 5 ning tuiga.
Matod pa ni Posadas nga nabuking ang linuog nga binuhatan ni Luis human ang usa sa mga manghod nga anak nga lalake sa suspek maoy nidunol ngadto sa ilang inahan sa usa ka yellow pad nga suwat diin didto gisumbong ang linuog nga buhat sa ilang amahan.
Giingong niadtong Agosto 6 ning buwana gitunol sa anak ngadto sa iyang inahan ang suwat dihang giduaw sila niini sa Tuburan atol usab sa adlaw nga natawhan sa 17 anyos nga biktima.
Sanglit nahadlok ang mga biktima kay gibaharan sila sa ilang amahan nga patyon silang duha kon motug-an sa iyang gibuhat, wa gyud sila makasumbong.
Apan wa na gyud sila makaantos hinungdan nga atol sa birthday sa 17-anyos ilang gitumong ang pagtunol sa suwat sanglit duawon man sila sa ilang inahan.
Diha-diha ang inahan kinsa nagtrabaho isip katabang ug di usab makahibawo mobasa, nipabasa sa suwat sa iyang anak sa iyang igsuon.
Didto na niya nasayran sa suwat ang linuog nga gihimo sa suspek.
Ang suspek hugtanong nanghimakak sa pasangil.
Matod niya nga biktima lang siya sa iyang kapuyo tungod kay naglagot kini kaniya human iyang gipatay ang laing gikapuyo niini niadtong November 1, 2003.
Apan niadtong 2005 nakagawas siya sa CPDRC human siya nidaog sa kaso sanglit wa na mutunga ang iyang kapuyo nga maoy complainant sa kaso.
Ang inahan, 17, ug 12 anyos nga biktima naghinilakay nga niatubang sa mga sakop sa media nga nipadayag nga gusto na silang mapriso ang suspek gumikan sa nabuhat niini kanila sa makadaghang mga higayon.
Si Posadas nagkanayon nga kasong pagpanglugos, ingon man violation sa R.A7610 kun Anti-Child Abuse Law ang atubangon sa suspek.