Estrella Dolores
Cebu City
SAMA kini sa tukog nga mabali. Sa layang dahon nga sayon rang tapdason sa hangin. Sa buhok nga manglarot. Sa panit nga modugo. Ingon man sa kasingkasing nga mohilak.
Gitak-op ni Jolie ang magasin nga iyang gibasa kay lapoy na ang iyang mga mata. Unya ra siya mopadayon sa pagbasa. Nagkanindot ra ba unta ang mga sugilanon.
Sa dugay niyang pinangita sa tinuod nga kahulogan sa kahuyang nakaamgo na siya nga batong bantilis ang kasingkasing ni Myra. Ang babaye nga iyang gimahal di tawo. Di gani mananap kay ang mananap mohilak man kon sakitan. Si Myra di mokihol. Morag way kasingkasing. Mora gyug bato.
“Mao gyud na ang babayeng guwapa, Bay, dugayng pasugton.” Gidaygan siya ni Oliver, human niya sultihi sa kagahi ni Myra. “Ayaw lag surrender gud.”
Lima na ka tuig ang iyang pagpanguyab kang Myra. Apan wa gyud siyay nakita nga gingi sa paglaom nga siya sugton. Ang tanan iya nang nahimo. Kada adlaw ang iyang pagpadag lab-as nga mga rosas. Magda pa siyag karton sa chocolate inigbisita niya. Mohatag mga regalo panahon sa iyang birthday, Pasko ug ubang mga halandumong adlaw sa kinabuhi ni Myra.
Usa ka adlaw niana gidaygan siya ni Myra nga di na mag-usik-usik pag panahon kay wa siyay mapaabot kaniya. Ah, nakaamgo na pod siya. Tiamoy napulo na ka mga tuig ang iyang pagpangulitawo. Siya ra ang nagdugay. Daghang nangulitawo, apan sama niya gipangbasted sad. Diha toy dato. Diha toy morag artista ang kaguwapo. Diha gani toy basketball player. Siya ray minos og hitsura, apan manager sa usa ka dakong banko.
Busa, wan a siya patim-aw sa ilang Myra. Nakahukom siya nga mangita na lag laing babaye. Bisan gihinugnan siya kang Myra. Kay kini matahom kayo. Angay gyung pangasaw-on. Usa ka adlaw niana nakadawat siyag suwat gikan kang Myra. Gitug-an niini ang tinaguan sa iyang pagkatawo. Iya kuno kining gibatukan sa taas na kaayong panahon. Karon, nakahukom na siya sa pagtapos sa tanan.
Nagpanglingo siya. Lakin-on diay si Myra. Bantog rang gahi. Apan wa siya kaayo kasabot sa katapusan niyang gisulti sa sulat. Pagka sunod adlaw iya na lang nabalitaan nga naghikog si Myra. Biktima sa kaugalingon niyang kahuyang.
Paghumag basa niya sa sugilanon nga nag-ulohag ‘Kahuyang,’ gipadaplin ni Jolie ang magasin. Nagpanglingo siya kay susama gyud niini ang iyang kaagi. (KATAPUSAN)