ALANG kang Senate Majority Floorleader Vicente ‘Tito’ Sotto III, makapabalaka kining gitawag nga finance team ni Presidente Noynoy Aquino III.
Lalim bay, matod sa senador, nga kining si Commissioner Kim Jacinto-Henares niinsister gyud niining pagkolekta og buhis sa toll sa mga dagkong highway didto sa Luzon. Ang tax buhisan pa gyud. Bisan og giingnan na kini si Henares nga wa kini sa balaod, nagpagahi gyud og ulo.
Tungod niining bright idea ni Henares, nisakay ang Malakanyang sa maong lakang sa BIR mao nga nasupalpal na hinuon ang administrasyon ni Presidente Aquino sa Supreme Court.
Sa akong tan-aw, dunay punto si Sen. Sotto kay kon ingon niini ang panghunahuna sa atong BIR chief, unsa na sab kaha ang iyang kolektahan og tax, ang atong paggamit sa text message?
Sa Bureau of Customs sab, gitudlo ni PNoy ang usa ka tikasan sa golf nga mao si Commissioner Angelito Alvarez.
Kay di kumbinsido ang majority floor leader niining mga giduso ni Finance Secretary Cesar Purisima, iyang birahan kining Cabinet official diha unya sa Commission on Appointments.
Hinuon, niingon si Sen. Sotto nga maayo sa man sa heneral ang performance ni PNoy gawas lang nga di siya kumbinsido sa iyang finance team tungod niining maong mga punto.
Alang kanako, angayang hatagan og benefit of the doubt kining mga appointment ni PNoy apan di sab gyud makatabang ang mga lakang sama niining pagbutang og value-added-tax sa toll sa mga highway. Gikuyawan gyud ko sa sunod mahunahunaan nga buhis niining Commissioner Henares sa BIR.
Nakaingon ko sa akong kaugalingon nga maayo gyud sa pagpagwapo kining City Hall sa Syudad sa Sugbo tungod niining resulta sa usa ka survey nga most honest ug most transparent sa mga giingong growth center gawas sa Metro Manila.
Nganong sa pagpagwapo lang? Kay di man gyud tinuod nga transparent ang City Hall. Sulod sa pipila ka termino sa Konseho nga way oposisyon, halos wa nay nakautingkay sa mga pinansyal nga kahimtang sa syudad ug ang atong impormasyon kutob lang gyud kon unsay ilang gustong ipasibya sa media.
Lahi man gud kon ang Konseho dunay oposisyon nga maoy motuki sa mga proyekto ug mga transaksyon sa maong lokal nga kagamhanan halipay nga angay kuno sa mga senior citizen ug sa mga nang-gradweyt sa high school.
Apan pipila nako ka mga kaila ang nagbagulbol gyud dihang nibayad na sa ilang tunghaan karong bag-o kay di man ma-honor ang ilang mga certificate nga gihatag sa City Hall. Wa pa kuno pundohi.
Maayo kaayo sila nga nakapanghambog kaniadtong nagkampanya pa sa piliay.
ANG UBAN?
Ug kon ingon niini ang pagtan-aw sa kagamhanan sa Syudad sa Sugbo nga alang kanako di gyud ingon niana ka transparent, unsa na lang kining ubang mga giingong growth center?
Sa pagkakaron, nitutok gyud pagmaayo ang administrasyon ni PNoy sa pagwagtang sa pangurakot diha sa BIR ug Bureau of Customs. Iya na sab nga gitan-aw ang ubang mga government corporation ug agencies nga daghan sab og mga milagro sama sa mga dagkong mga benepisyo alang sa mga sakop sa board ug mga opisyal samtang way klaro diay ang serbisyo.
Apan kinahanglan sab gyud nga lili-on kining mga lokal nga kagamhanan kay mao kini ang duol sa katawhan ug mo-reflect sa administrasyon kon ang mga saad niini di matuman.