USA ka suspetsadong kawatan ang nadakpan sa kapulisan ug mga tanod sa Barangay San Antonio, dakbayan sa Sugbo sa miaging kaadlawon.

Ang nasikop mao si Dexter Reston Trocio, 28, ulitawo ug nagpuyo sa samang barangay.

Ang tag-iya sa panimalay nga si Victoria Nuñeza, 55, minyo, taga 42-E, Don Pedro Cui, San Antonio maoy nitaho sa awtoridad.

Updates on President Benigno Aquino III's presidency

Nahitabo ang pagsuway og pagpangawat sa alas 3:00 sa kaadlawon dihang ang suspek nilipot sa luyong pultahan sa balay ug nakit-an siya ni Sem Nuñeza, 22, pag-umangkon sa tag-iya sa balay, nga nagkuhitkuhit sa lock sa pultahan.

Nitawag siya og tabang sa barangay hall sa San Antonio nga nipada dayon og Barangay Tanod sa dapit.

Dihang nakabantay ang suspek nga dakpon na siya, nidagan kini ug pagkatkat sa koral sa balay apan gigukod sa mga Barangay Tanod ug kapulisan.

Sila si PO2 Remos Goco ug PO2 Joel Leyson maong nangulo sa pagtubag sa alarma ug ang suspek ilang na-corner sa mobile patrol car sa dalan F. Ramos sa silingang barangay hinungdan nga nasikop.

Nagkuha usab gikan sa suspek ang duha ka pakete nga gituhoang shabu.

Ang suspek gikatakda nga pasakaan og kasong attempted theft ug sa kalapasan sa RA 9165 Section 11 o possession of dangerous drugs. (Jose Lewis J. Gachalian-USJR Masscom Intern)