COMPOSTELA VALLEY PROVINCE - Usa ka mag-uuma ang napusilan sa mga pulis dihang naghuramentado sa alas 8:00 sa buntag niadtong Martes didto sa Purok 3, Special Barangay Liboton, Aguinaldo, lungsod sa Laak.
Subay sa report nga nakuha gikan sa Compostela Valley Provincial Police Office, nasayran nga usa ka Melchora La Paz Canete, 53, ang mitaho ngadto sa Laak Municipal Police Station nga siya giatake sa kaugalingon niyang anak nga si Reagan La Paz, 19, ulitawo, mag-uuma kinsa naghurumentado'g nagdala-dala'g sundang ug gipangguba ang bungbong sa ilang balay.
Kapulisan sa Laak, pangulohan ni ni Police Inspector Noel Pasaylo Hista daling miresponde sa dapit ug ilang naabtan ang suspek nga didto sa gawas sa ilang balay nga armado sa duha ka tag-as nga sundang.
Mga pulis mihimo sa pag-istorya sa suspek ug gihangyo nga motahan nga malinawon.
Apan ang suspek wala maminaw ug nahimong agresibo pa pinaagi sa pag-atake sa mga pulis gamit ang duha ka mahait nga sundang nga gihuptan.
Duha ka metros ang distansiya, luyo sa pabalik-balik nga gihimong pahimangno sa mga pulis, ang suspek padayon nga miatake hinungdan nga si Hista napugos sa pagpabuto sa iyang service pistol tumong sa suspek sa tinguha nga mohunong sa pag-atake.
Ang suspek naigo sa walang bahin sa pulso ug gidali pagdala sa mga pulis paingon ngadto sa Compostela Valley Provincial Hospital sa Poblacion, Laak aron nga matambalan.
Nagpadayon pa ang imbestigasyon kabahin sa maong hitabo. (Dexter T. Visitacion)