MAAYO ba nga itugot na ang abortion? Dunay kisaw karon didto sa kamara baha diin gisugyot nga himuong legal ang abortion dinhe sa nasud.
Gitaho niadtong mga nagduso sa sugyot nga nagkadaghan karon ang mga babaye nga nagpapunit sa ilang gisabak. Wa hinuon ta nakuha ang eksaktong datus sa gidaghanon sa mga nagpa-abort sa ilang gisabak nga bata.
Ang pagpa-abort sa gisabak gidili ug adunay silot ubos sa Revised Penal Code of the Philippines nga namugna niadtong 1930 ug nagpabiling buhi hangtud karon. Mga Articles 256, 258 ug 259 sa Code nagmando sa pagpriso sa usa ka babaye nga magpa-abort lakip na ang tawo nga mibulig sa maong pamaagi.
Tinuod nga bisan pa sa ka-peligro sa maong pamaagi apan matag karon ug unya adunay mapalgan nga mga bata kun fetus nga bag-ong gi-abort nga gilabay sa lainlaing mga lugar. Timailhan kini sa abortion.
Ang abortion bisag unsa pay ilang rason angay gyud nga idili ug dili angay itugot sa balaud.
Aron nga dili magsabak, kinahanglan nga ang usa ka babaye ug lalaki magmatngon ug maghunahuna sa lintunganay sa ilang pagabuhaton. Kun magpaturagas ang babaye lakip na ang iyang hinigugma, didto gyud mosangko sa pagmabdos.
Kun itugot ang abortion, nan, daghan na ang mga babaye nga magsalig total gitugot naman ang pagpapunit sa batang nga ilang ipanamkon.Apan kun padayon nga dili itugot ang abortion, mga babaye maghunahuna una sa makadaghan kun muoyon ba makighilawas sa ilang hinigugma.
Pasagdan ta ang ubang nasud nga liberal ra kaayo. Lahi ang ilang kultura, lahi ang atua.