GIPANGITA sa mga otoridad ang upat sa mga tawo kinsa mipusil patay sa usa ka bakasiyonista didto sa Sitio Monteflor, Barangay Colosas, distrito sa Paquibato, siyudad sa Davao niadtong Huwebes.

Si PO3 Rufino Hernandez, imbestigador sa Paquibato Police Station, nagbutyag sa iyang spot report nga ilang gisusi karon ang motibo sa pagpusil patay kang Julius Deano Tamondes, 24, ulitawo ug nagpuyo sa New Casay, Dujali, Davao del Norte.

Updates on President Benigno Aquino III's presidency

Matud ni Hernandez nga igo lang mibakasiyon ang biktima sa balay sa iyang ig-agaw nga si Lino Jentodares sa Sitio Monteflor apan wa niya damha nga kamatayon ang moabi-abi kaniya sa maong dapit.

Nasayran nga paingon unta ang biktima sa ibabaw nga bahin sa balay sa iyang ig-agaw aron ayuhon ang naguba nga hose tubig apan giatangan siya sa upat ka mga tawo.

Mga mamumuno pulos nagbitbit og carbine rifle ug way daghang pangutana gipusil ang biktima sa makadaghan nga higayon.

Si Tamondes nakaangkon og daghang samad sa kalawasan nga miresulta sa iyang kamatayon.

Nakuha sa kapulisan ang mga tipaka sa bala sa armas nga gigamit sa mga mamumuno didto sa crime scene.

Samtang gihaya ang biktima didto sa New Casay, Dujali gilusad sab sa kapulisan ang lawom nga imbestigasyon aron tugkaron kung unsa ang motibo ug ilhon ang mga suspetsado. (AD)