ANG katawhan gipahimangnoan sa kapulisan nga di biyaan ang ilang panimalay aron di sudlon sa mga kawatan ilabina na karong pagsaulog sa Kadayawan Festival sa siyudad sa Davao.
Ang pahimangno miguwa human sunod-sunod nga miatake ang mga kawatan sa area of responsibility sa Talomo Police Station niadtong Sabado.
Mga kawatan malampuson nga misulod sa balay ni Myrene Bangoy, 34, Overseas Filipino Worker ug nagpuyo sa Tulip Drive, Matina, ning siyudad.
Si Bangoy nagbutyag sa kapulisan nga nahanaw na ang iyang usa ka bag nga Louis Vuitton nga nagkantidad og P30,000; IPod nga nagkantidad og P20,000; tulo ka camera nga nagkantidad og P65,000; Laptop nga nagkantidad og P70,000; videocam nga nagkantidad og P35,000; alahas nga nagkantidad og P32,000; kwentas ug arites nga nagkantidad og P39,000.
Matud ni Bangoy nga iyang nadiskubrehan nga nahanaw na ang nahisgutang nga mga butang sa iyang paghimata sa alas 7:30 sa buntag niadtong Sabado.
Giingon nga nakasulod ang mga kawatan pinaagi sa pagguba sa window grill sa ilang balay.
Samtang alas 12:00 sa udto, nadiskubrehan nga nahanaw sab ang mga mahalong butang ni River in God Pastor Blair Cuares, 40, minyo ug nagpuyo sa # 887 Times Beach, Matina Aplaya, ning siyudad.
Si Cuares nagbutyag sa kapulisan nga ilang gibiyaan ang ilang balay niadtong adlawa tungod kay miadto sa Island Garden City of Samal, apan sa ilang paghibalik abli na ang pultahan sa ilang balay.
Nahanaw ang usa ka duha ka laptop nga nagkantidad og P62,000, mga cellular phone nga nagkantidad og P30,000 ug relo nga nagkantidad og P4,000.
Tungod sa maong mga hitabo, nanawagan karon ang mga otoridad nga di gayud biyaan ang balay sa katawhan aron di sila mahisama sa gidangatan nila Bangoy ug Cuares. (AD)