DUHA ka mga minor de edad nga miyembro sa New Peoples Army (NPA) ang misurender didto sa probinsiya sa Cotabato.
Nailhan sa kapulisan ang mga bata nga rebelde nga sila si alyas Max, 13 ug Fernando, 14, ug mga molupyo sa Magpet Cotabato.
Gibutyag ni Senior Inspector Glenn Alegado, hepe sa kapulisan, sa Magpet nga ang duha ka mga bata sakop sa Black Fighters Group sa NPA nga nalambigit sa pagpangilkil ngadto sa mga mag-uuma ug pagpangawat og mga kahayopan.
Matud ni Max sa pakighinabi sa Bombo Radyo nga nakadesisyon sila nga mobalik sa sabakan sa balaod gumikan kay wala na sila makauyon sa gihimo sa NPA gawas nga apil ang ilang pamilya biktima sab sa kamangtas sa mga rebelde.
Si Magpet Mayor Efren Piñol naghangyo sa mga batang rebelde nga nagalihok sa ilang dapit nga mosurender na gumikan kay wala silay kaugmaon sa ilang hiwing gipakigbisugan batok sa gobyerno.
Nipasalig sab si Cotabato Governor Emmylou Mendoza ngadto sa duha ka bata nga mitahan sa mga otoridad nga tabangan sa ilang pagtungha.
Ang duha ka mga batan-on nga NPA anaa karon sa kustudoya sa Provincial Social Welfare and development Office gumikan kay mga minor de edad. (Edgardo Fuerzas)