KAPIN usa ka sakong marijuana ang nakompiska sa mga sakop sa Philippine Drug Enforcement Agency (PDEA)-Northern Mindanao sa alas 4:00 sa kadlawon niadtong Sabado, didto sa Purok 14, Barangay Bulak-Iba, Cabanglasan, Bukidnon.
Gironda sa mga sakop sa PDEA pinangulohan ni Director Edwin Layese ang panimalay sa mga suspek nga sila si Ruel Bernas ug Joel Bacalso gamit ang search warrant nga gipagawas sa korte.
Nasikop dayon sa PDEA si Bacalso, apan naka-ikyas si Bernas.
Matud ni Layese nga ilang nakuha ang marijuana sa panimalay sa mga suspek nga gibanabanang balor og kapin 80-mil pesos.
Si Layese miingon nga milampos sila sa pagkompiska sa maong druga tungod sa tabang sa mga nagpakabanang mga tawo sa lugar.
Giandam na ang kaso nga ipasaka batok sa suspetsado nga padayong gi-imbestigar aron madakpan ang ilang mga kauban.
Gipahugtan karon sa PDEA ug kapulisan ang ilang operasyon sa utlanan sa mga North Cotabato ug Bukidnon nga giingong dunay mga dagkong plastasyon sa marijuana. (Edgardo Fuerzas)