USA ka pulis napalgang patay human gituohang nagpakamatay pinaagi sa pagpusil sa iyang kaugalingong sulod mismo sa Police Station didto sa lungsod sa New Bataan, Comval Province, Sabado sa kaadlawon.

Nailhan ang biktima nga mao si PO3 Ramil Quipao, hamtung ang panuigon, ug molupyo sa sa Elenita Heights Subdivision, Mintal, siyudad sa Davao.

Updates on President Benigno Aquino III's presidency

Sa report gikan sa Comval Province Police Provincial Office, nasayran nga pasado alas 3:00 sa kaadlawon gituohang nagpusil sa iyang kaugalingon gamit ang iyang service semi- automatic M16 rifle sulod mismo sa radio room sa New Bataan Municipal Police Station ang biktima.

Nabuslot gayod ang agtang sa biktima hinungdan sa iyang hinanali nga kamatayon. Mga sakop sa Scene of the Crime Operatives (Soco) nakahipos og usa ka empty shell sa M16 rifle nga maoy gituuhang gigamit sa biktima ug usa ka suicide note nga gituohang iya sa biktima.

Sumala pa ni Police Chief Inspector Leonardo Tarongoy, hepe sa New Bataan MPS nga wa silay nasayrang bug-at nga problema ang biktima nga maoy hinungdan sa pagpakamatay niya sanglit wa siya nagasugilon sa iyang mga kauban mahitungod sa iyang personal nga kinabuhi.

Dugang ni Tarongoy nga usa lamang ang ilang nasayran mahitungod sa biktima nga ang iyang asawa didto sa nasud Singapore nagtrabaho.

Gikatakda unta nga mo-leave of absence ang biktima aron mupaas sa iyang asawa.

Ang biktimang si Quipao kapin duha na ka tuig nga nadestino isip radio operator sa maong buhatan.

Patay nga lawas sa biktima gipahiluna na karon sa usa ka punerarya sa lungsod sa New Bataan. (Marvin Pineda)