Mayor nagtuo nga pulitika motibo pagpatay sa kapitan

SI MAYOR Marivic Diamante sa lungsod sa Kiblawan, Davao del Sur, nanaghap nga pulitika gyud ang motibo sa pagpusil patay ni Barangay Sto. Niño Kapitan Ananias Pelletero, sa miaging semana.

Apan ang pamilya sa biktima hanaw pa kun unsa'y hinungdan sa tanan. Nagsubo sab ang katawhan sa lugar sanglit alang nila usa ka maayong lider sa lugar ang gipatay.

Si Pelletero gipatay sa mga lalaking naka-motor didto sa Barangay Tanwalang, Sulop, samtang mopauli na sa iyang barangay gikan sa siyudad sa Digos.

"Wala gyud ko kahibalo kung unsa'y ilang intensyon sa pagpatay sa akong bana," matod ni Nelda, asawa ni Pelletero.

Dako ang pagduda ni Mayor Diamante nga anggulong pulitika ang motibo ang nagpaluyo sa krimen ilabi pa kay wa kini pilde-pilde sa ilang lugar.

Gihulagway nga magpasubli na sab si Pelletero sa eleksyon karong buwan sa Oktubre ug gilantaw nga modaganay pagka-Presidente sa Federation of Association of Barangay Council sa lungsod.

"I am very much sure that it is politically motivated," ni Diamante pa.

Wala pa'y bisan usa nga matudlong suspek ang kapulisan.

Apan gitahasan na ni Senior Superintendent Ronald dela Rosa, provincial police commander, hepe sa lugar nga sulbaron ang krimen.

Sa pagkamatay ni Kapitan Pelletero, gitakdang mohulip sa iyang posisyon ang nag-unang barangay kagawad sa lugar apan wa pa kahibalo ang pamilya hasta si Diamante kung kinsay ipuli kaniya nga himuong manok sa administrasyon. (Orlando B. Dinoy)

Related Stories

No stories found.
SunStar Publishing Inc.
www.sunstar.com.ph