SI DAVAO del Sur Governor Douglas Cagas na mismo ang nanawagan ngadto sa Sangguniang Panlalawigan (SP) nga magmugna og ordinansa sa madaliang panahon aron idili ang pagsul-ob og bonnet sa mga tawong magsakay og motorsiklo.

Ang sugyot nahimo human gigamit sa mga kriminal ang bonnet aron tabunan ang ilang nawong atol sa paghimo og krimen.

Updates on President Benigno Aquino III's presidency

Gumikan niini, gihangyo sa gobernador ang SP nga mopasaka og resolosyon nga hugtanong magdili sa pagsul-ob og bonnet sa Davao del Sur.

"Dili lang selling kundi buying sab," pagklaro ni Cagas.

Alang niya, bisan ang pagunit-gunit og bonnet angayang iapil sa ordinansa kay giingong sul-ubon lamang kini sa mga suspek human makahimo og krimen.

Nangandam sab ang Davao del Sur provincial police office (DDSPPO) sa pagpatuman ugaling mahimo na nga ordinansa ang maong sugyot.

Gitataw ni Senior Superintendent Ronald dela Rosa, provincial police commander, nga angayan'g pahibaw-on nila ang katawhan nga mamahimo nang dakpon ang magsul-ob og bonnet ugaling mahimo na ang ordinansa sa SP.

Daw namatikdang nigara na ang mga kriminal nga giiingong mga sakop sa "Gun for Hire" sanglit wa'y bisan usa kanila nga nadakpan ang kapulisan.

Gani, nagtuo sab ang katawhan nga gitukod na dinhi ang Davao del Sur Death Squad nga giingong gisundog sa dakbayan sa Davao. (Superbalita)