Nadela: Mga motorista nag-antos

GIHANGOP sa mga molupyo ang pahibalo sa Metro Cebu Water District (MCWD) nga sa katapusan makatubig na gyud ang subidahon nga sa Barangay Kalunasan, ilabi na ang duol sa Shrine, Unit 2 og Villa Remedios. Mahitabo ni sa dili madugay kay nagsugod naman ang mo-supply sa tubig pagkawot og paglunod sa ilang tubo. Bisan kami nga dili apil sa maong proyekto mihangop ning maong kaugmaran kay di lalim ang pag-antos sa mga tawo sa maong mga dapit, ilabi na niadtong panahon sa ting-init. Samtang nga naghinamhinam ang mga tawo pagpa-abot, wa lang sab damha nga mitumaw ang problema nga nakahasol sa mga motorista.

KALOT

Daan na nga apiki ang karsada nga gi-agi-an sa kalot nga gipasiugdahan. Maglisod man gani ang duha ka sakyanan nga magsugat, misamot paghiyos ang gilapdon sa karsada sa dihang gisugdan og bugwal ang yuta. Resulta puerting away, lalis og siningkahay ang nahitabo tali sa mga driver nga naapiki og kanunay gyud maapiki tungod sa gihimong pagkalot.

Di man ni malikayan kay unsaon man pag-abot sa tubig kong way tubo nga ilubong. Ang di lang nako masabtan ngano nga wa maplano og maayo unsaon nga di mapagan ang bul-og sa trapiko samtang nga gipatuman ang maong proyekto. Kung moingon ang taga MCWD pasensya lang kay di gyud ni malikayan, supak ang mga motorista ning maong katarungan.

Kung ako pa si Kapitan Eddie Mabano di ko mosugot nga magkalot sila panahon sa adlawan. Kinahanglan nga matag gabii ra sila magkalot og ang ilang kinawtan kinahanglan nga anamon og tabon.

Sa uban nga proyekto nga gipasiugdahan nga naglambigit niining pagkalot daplin karsada, steel plate maoy ilang temporaryo nga itabon. Bisan anino sa steel plate wa gyud ko kakita diha sa Unit 2 nga maoy grabing naapektohan sa sinardinas nga bul-og sa trapiko.

Ang katawhan nagkinahanglan og proyekto, Wa man gani sila makabutang og suga aron magiyahan ang mga motorista panahon sa kagabhi-on. Ambot nganong gitugutan ni sa Citom nga klaro man kaayo ni nga kalapasan sa lagda. Kong ma-shot sa lungag nang mga habal habal nga maoy bugtong transportasyon sa Camp Marina, kinsa may manubag?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph