SI Senador Franklin Drilon nipasaka sa Senate Bill (SB) No. 2407 niadtong Biyernes diin nagduso sa pagbalhin sa buwan nga ting-abli sa klase ngadto sa Septiyembre gikan sa Hunyo matag tuig.
Nag-unang gitumbok ni Senador Drilon ang kahimtang sa pagsud sa panahon nga ting-uwan sa Hunyo nga hinungdan sa pagkabalda sa pag-abli sa klase. Baha, pagdahili sa yuta o flashfloods.
Ang mga edipiyo sa tunghaan kanunay mahimong evacuation centers sa katawhan nga apektado sa katalagman.
"It has become impractical and unwise to commence the school year during the typhoon season as students, parents and school authorities have to deal with floods, landslides, diseases, lack of transportation and damaged school buildings," tipik sa SB No. 2407 ni Sen. Drilon.
Apan ang Septiyembre namatikdan nga mas grabe na hinuon ang panahon sa pag-uwan, insakto kaha si Sen. Drilon sa iyang gihimong rason? o May lain siyang nagpahipi nga hinungdan sama sa pagpareha sa ting-abli sa klase sa US? Kolonyal nga mentalidad.
Kon tungod sa panahon ang tinuod nga rason sa pagduso ni Sen. Drilon sa naasoyng balaudnon, Marso o Abril maoy mga buwan nga layo sa ting-uwan - pagsugod na sa ting-init.
Busa kadudahan kaayo ang pagduso niya sa SB No. 2407. Dakong impraktikal ang pag-usab sa dunay nang naandan nga pag-abli sa tingklase sa Hunyo.
Samtang, mas daghang nag-unang isyu nga angay atimanon sa mga magbabalaud - ang pagluwat sa igong pundo ug suporta nga balaud alang sa pagpalambo sa kalidad sa edukasyon.
Hinuon, ang SB No. 2407 sugyot pa lang nga balaudnon ni Sen. Drilon apan ning sayo pa, angay na kining supakon.