SUPAK si Sen. Ferdinand “Bongbong” Marcos Jr. sa tinguha ni Pres. Benigno “Noynoy” Aquino III nga wagtangon ang Sangguniang Kabataan (SK) nga ang iyang amahan maoy niumol nga ang kabatan-onan malangkob sa gobyerno.
Matod ni Marcos nga gikinahanglan nga ang kabataan angayan lang nga may representante sa pagpadagan sa gobyerno.
Ang senador nitumbok hinuon nga ang SK nga karon naapil sa sistema sa pangagamhan wa gyod kini molampos nga nasugdan sa panahon sa iyang amahan nga si kanhi Pres.
Ferdinand Marcos.
“Reexamined and reorganized,” maoy sugyot niya ning sitwasyon karon sa SK.
Gikatakda nga ilang tukion sugod karong adlawa ning isyuha.
Nagtinguha siya nga atol sa hearing ilang pangutan-on ang lokal nga mga opisyal kon unsay angayan nga himuon ning kabahin sa grupo sa mga kabatan-onan.
Si Marcos namahayag nga mamahimong ilisan og pangalan ang SK apan buot niya nga magpadayon gyod nga may representasyon ang kabataan sa panggobyerno.
“Hindi solusyon ang abolisyon ng Sangguniang Kabataan kung ang ninais ay magkaroon ng direktang partisipasyon sa gobyerno ang bagong henerasyon. Mawawalaan ng tiyak na lugar kung saan maaring tumindig at makiisa ang kabataan sa pagtataguyod ng bansan,” nagkanayon ang usa ka pahina nga advertisement gikan sa SK nga napatik sa mga mantalaan.
Kabahin sa mga gihisgutang isyu nga ang mga nahisakop karon sa SK sayo kaayo nga nakat-on sa pagpangurakot, ang senador nidepensa nga di kaayo kini makatarunganon nga panahom.
“Government is not only about corruption,” nagkanayon siya uban sa pagpadayag nga di lang ang pagpangurakot maoy ilang masinati kon nalakip sila sa pagpangalagad sa gobyerno.
Nitataw siya nga kon mao man gani kini ang sitwasyon karon, ang angayang buhaton mao nga ang pagpangurakot maoy sumpuon apan di ang SK maoy wagtangon na hinuon.
“Hindi solusyon ang abolisyon ng Sangguniang Kabataan kung ang kinukwetsyon ay korapsyon at kakulangan ng mga makabuluhang proyektong naisakatuparan. Patunay ang matagumpay na mga programang naidaos ng grupo. Saksi mismo ang mga SK at mga kasapi,” dugang napatik sa advertisement sa SK. (JECT)