USA ka minero nga wa mauyoni ang estilo sa iyang pagsayaw atol sa disco sa piyesta sa Barangay Canbantug, lungsod sa Argao ang gipusil-patay kagahapon sa kaadlawon.
Ang biktima nga si Roland Requina, 25, ulitawo, taga Sitio Tigaw-Tigaw, Barangay Cansuje ug minero sa usa ka minahan sa lungsod.
Natusaktusak ang lawas sa biktima sa mga bala sa armas nga gigamit sa suspek.
Kauban minero ang suspek sa pagpamusil nga si Samuel Betonta, 39, taga Barangay Linut-od sa samang lungsod.
Si PO2 Bernie Lao, desk officer sa Argo Police Station nga nahinabi sa Sun.Star Superbalita, nagkanayon nga ang biktima ug ang suspek nag-abot sa disco atol sa piyesta sa nahisgutang barangay.
Apan ang duiha nagkaaway tungod sa estilo sa sinayawan sa biktima ug nisangko sa pagsinukmagay sud sa diskohan.
Dihang nidagan ang biktima, gigukod sa suspek ug gipusil makadaghang higayon ug namatay dihadiha.
Si PO2 Lao nagkanayon nga ang suspek wa dayon motahan sa kapulisan hinungdan nga gipusil sa iyang wang batiis sa armalite nga gidala ni Sgt. Ronnie Yambot, team leader sa 78th Infantry Battalion nga nakabasi sa nahisgutang lugar hinungdan nga na neutralized ug nadakpan.
Daling gidala sa tambalanan sa nahisgutang lungsod ang suspek, kinsa nakuhaan sa iyang posisyon sa usa ka kalibre .45 uban sa mga bala, duha ka kabhang.
Samtang, nakuha usab duol sa awas sa biktima nga usa ka .357 uban sa lima ka bala niini ug usa ka bala sa .38 revolver.
Apan dugang nasayran ni PO2 Lao nga dugay nang nagkabangi ang duha busa gamay na lang ilang bikil dihang nag-abot sa dioskohan.
Gihikay na sa kapulisan sa Argao ang tukmang kaso nga ipasaka batok sa suspek karong adlawa.