KRITIKAL ang kahimtang sa 20 anyos nga ulitawo human milala og hilo niadtong Domingo mga alas 2:00 sa hapon sulod sa puloy-anan niini sa Barangay Basak, lungsod sa Talakag, Bukidnon.

Giila ang biktima nga mao si Gerald Benanday, kinsa nag-inom og hilo nga gitawag og "round up" diin maoy gamiton sa pag-spray sa mga tanom.

Updates on President Benigno Aquino III's presidency

Gidala sa Northern Mindanao Medical Center (NMMC) ning siyudad sa Cagayan de Oro si Benanday human namatikdan sa amahan nga nagbula ang baba sulod sa lawak.

Gisaysay sa amahan nga sa wala pa nag-inom og hilo ang iyang anak, gitug-an niini nga gibulagan kini sa iyang uyab ug nasakitan kini pag-ayo labina nga taod-taod na ang relasyon sa iyang hinigugma.

Giingong kanunay lang anaa sa iyang lawak ang ulitawo ug wala na nagawas apan nakurat ang amahan dihang pagtuktok ug pagsulod, nakaplagan nga nagbula ang baba niini ug nagubuy-od sa salog.

Nakita usab dayon ang botelya sa hilo nga hapit na mahurot hinungdan nga daling nagpatabang ug nagdesisyon dalahon sa duol nga balay tambalanan.

Apan giduso gihapon sa NMMC ning siyudad.

Sa pagsulat ning balita, kritikal gihapon ang kahimtang sa biktima nga padayon pa nga giatiman sa mga doktor.