SA MIAGING semana, gibutyag ni Police Senior Inspector Ariel Philip Pontillas, station commander sa Police Precinct 9, ang paglapas sa tulo ka mga barangay kapitan -- Marvin GontiƱas sa Barangay Agusan, Alexander De la Cerna sa Barangay 26 ug Noel Ilogon sa Barangay 25 -- sa City Ordinance 5133-95 kon ordinansa nga nagdili sa pag-inom sa publikong dapit nga dayag sa katawhan.
Gipahibaw ni Pontillas ang hitabo ngadto sa SuperBalita niadtong Huwebes ug migawas sa mantalan sa Biyernes. Pero ang insidenti nahitabo niadto pang Sabado.
Basi sa report, walay nahitabong pagpangsikop sanglit igo lang gibadlong sa kapolisan ang tulo ka mga barangay kapitan. Apan wala kuno mahimuot si Pontillas sa gipakitang taras sa tulo ka mga opisyal kay gibalewala ang iyang pagbadlong.
Karon, nanghimakak ang tulo ka mga barangay official sa pasangil batok kanila. Matag usa nila dunay nagkadaiyang rason paglingkawas nila sa alegasyon.
Kon duna may dakong tulobagon si Pontillas ngadto sa katawhan mas labawng dunay dakong responsibilidad ang tulo ka mga barangay official pagpatin-aw ngadto sa ilang tagsa-tagsa ka barangay.
Nganong wala man gisikop ang tulo ka mga barangay kapitan nga nakalapas man kaha sila sa ordinansa. Nganong milanat pa og pipila ka adlaw una gipahibaw ni Pontillas ang insidenti ngadto sa publiko.
Matod sa tulo ka opisyal, wala sila masayod sa maong ordinansa. Dili kana maoy rason nga magpasaway nalang pod atubangan sa publiko.
Mas maayong tul-iron nato kining mga polis nga talawan mosikop niadtong dayag nga nakalapas sa balaod o ordinansa. Kay daghan ra bang higayon nga magpataka lang sila og pagpangsikop niadtong walay mga sala.
Gamay man o dako nga paglapas sa balaod, bisan unsaon nato og husay, kon dunay pag-violate sa balaod, kinahanglan manubag ang milapas. Niining puntoha, pagpabaya sa katungdanan ang gihimo ni Pontillas ug sa tulo ka mga barangay official.
Pulos mo dunay katungdanan sa gobiyerno ug angay lang ipakita ninyo ang maayong ehemplo. Kon gusto mo tahoron, ipatuman ang balaod sa way pagpinig.
Angay mahibaw si Pontillas nga bisan dili kaayo bug-at ang ordinansa mas bug-at ang kalapasan nga nahimo sa tulo ka opisyal tungod sa ilang katungdanan sa barangay. Ug ang gihimo nila ni Gontinas, dela Cerna ug Ilogon nga wa morespeto sa kapolisan mas labawng salawayon kay sa ilang pag-inom sa publiko.