MURAG angay doblihon pa sa pulis ang paglutos sa mga gang dinhe sa siyudad sa Davao aron dili sila maka-perwisyo sa malinawong mga molupyo.

Sa alas 4:30 sa buntag niadtong Domingo, duha ka pundok sa mga gang ang nagpakita sa ilang kamangtas-- nagpinusilay didto sa Quezon Boulevard ning dakbayan.

Updates on President Benigno Aquino III's presidency

Isip resulta sa ilang away, usa ka babaye nga gituohan sab nga miyembro sa usa ka gang ang naigo sa bala.

Kadaghan na usab nahitabo nga mga inosenting sibilyan maangin sa away sa mga gang. Ang ila lamang sala mao nga didto sila sa lugar diin nagtakus ang mga batan-ong sakop sa gang. Mao kini ang giingon nga 'you are at the wrong place at the wrong time'.

Kinahanglan tingali nga bantayan na sa pulis ang mga lugar nga sagad mahitaboan sa mga rayot ug sutaon usab unsa nga adlaw kasagaran mahitabo ang rayot. Mas maayo usab nga magbatun na og listahan ang pulis kinsa kining mga notoryos nga mga sakop sa gang nga kanunay malambigit sa mga rayot.

Mahimo kaayo kini nila pinaagi sa tinuoray nga imbistigasyon.

Gawas niini, mas maayo nga pahugtan pa sa pulis ang pagpatrolya, ilabi na sa panahon sa kaadlawon. Total duna kita'y balaud sa curfuew, vagrancy ug uban pa mas maayo nga higpitan kini pagpahamtang aron masumpo ang mga dautang plano sa mga boguy nga mga batan-on.

Kanang mga latagaw nga mga batan-on sa kadalanan angay dakpon kay kun dili kana sila manulis, maghimo og samok.

Dako sab og ikatabang dinhi ang mga opisyal sa barangay ilabi na sa mga lugar nga kanunay mahitaboan sa mga rayot.