Batan-on gibugha sa Sultan Kudarat

USA ka batan-ong lalaki ang napatay human gipusil sa wala mailhing tawo nga nagsakay og motorsiklo alas 9 pasado ang takna niadtong Dominggo didto sa probinsiya sa Sultan Kudarat.

Nailhan sa kapulisan ang biktima nga mao si Humberto Samsona, 23, ug nagpuyo sa Barangay Poblacion, Bagumbayan.

Si SPO2 Ernesto Diongan sa Homicide Section sa kapulisan sa maong dapit, nagsulti nga samtang nagkanta-kanta ang biktima sa sulod sa videokihan sa maong dapit, kalit lang nibutho ang wala mailhing mamumuno ug gipusil siya gamit ang kalibre .45 nga pistola.

Matud pa ni Diongan nga human sa pagpamusil dali nga misakay ang suspetsado sa nagpaabot nga motorsiklo ug mipabulhot og padagan pahilayo sa maong dapit.

Si Samsona nga nahiagum og daghang mga samad pinusilan sa iyang lawas, gidala pa sa mga pulis sa Bagumbayan District Hospital apan gideklara sa mga doktor nga dead on arrival.

Gikompirma ni Rowela nga una gipatay ang iyang igsuon dunay nakaaway siyang grupo sa ilang dapit nga nalambigit sa gidili nga druga.

Walay nakaila nga mga kostumer sa mga suspetsado gumikan pulos sila naka-helmet.

Mga sakop sa homicide section sa kapulisan sa Bagumbayan padayon karon sa ilang imbestigasyon sa hitabo. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph