PATAY ang usa ka negusiyante human gipusil sa alas 9:20 sa buntag niadtong Dominggo didto sa siyudad sa Kidapawan.
Ang kapulisan nag-ila sa biktima nga mao si Roger Bacayo, 35, minyo ug molupyo sa maong dapit.
Sigun sa taho gikan sa Cotabato Police Provincial Office nga sakay ang biktima sa usa ka traysikel, uban ang iyang asawa ug anak, gikan sa ilang balay.
Apan pag-abot nila sa Crossing Marbel, kalit nga mibutho ang duha ka wala mailhing suspek ug gipusil si Bacayo gamit ang kalibre .45 nga pistola.
Patay gilayon ang biktima human maigo sa ulo ug dughan samtang ang mga mamumuno dali nga misibat paingon sa wala matino nga direksyon sakay sa XRM nga motorsiklo.
Matud sa pamilya ni Bacayo nga sa wa pa gipatay ang biktima, nakasulti kini nga dunay nadawat siyang hulga sa iyang kinabuhi apan wala niya gibutyag kon kinsa ang naasoy nga grupo.
Gisundan sa otoridad sa ilang imbestigasyon ang atraso o kaha selos sa negusyo.
Gimando sab ni Kidapawan City Mayor Rodolfo Gantuangco sa kapulisan nga susihon ang hitabo ug pakusgon pa ang ilang police visibility sa siyudad aron kapanalipdan ang katawhan gikan sa hulga sa mga dautang grupo. (Edgardo Fuerzas)