USA na sab ka abyon nga gigamit pang-spray sa sagingan nahagsa sa kasagingan didto sa Purok 6, Barangay Kimamon, lungsod sa Sto.Tomas, Davao del Norte, pasado alas 5:00 sa kaadlawon niadtong Sabado.

Sa nahagpat nga report gikan sa Davao del Norte Police Provincial Office kagahapon nasayran nga sa dihang molupad na unta ang usa ka abyon nga gipanag-iyahan sa Aeruworkz Aviation Corporation nga dunay body number RPR 1777 aron mag-spray sa kasagingan sa Dole-Stanfilco sa nahisgutang dapit kalit kini mitiurok sa kawanangan ug nahagsa.

Updates on President Benigno Aquino III's presidency

Nagtuwad na nga naumod sa kanal sulod sa kasagingan ang abyon sa dihang naabtan sa mga otoridad.

Hinuon, way gikatahong naangol o nasamdan atol sa aksidente.

Ang wa pa mailhing piloto sa abyon gikatahong wa nasamdan atol sa pagkahagsa.

Gawas sa maong eroplano way gikatalang dakung danyos sa maong aksidente.

Wa pa masayri kung unsa ang hinungdan sa pagkahagsa sa abyon nga gigamit pang-spray sa kasagingan.

Mga imbestigador gikan sa Air Transportation Office mihimo na og dugang imbestigasyon sa hitabo.

Ang aksidente maoy ikaduhang nahitabo sa lalawigan sa Davao del Norte karong bulana.

Unang semana sa Agosto nahagsa sab ang usa ka abyon nga gipanag-iyahan sa Lapanday Fruits Corporation samtang nag-spray sa kasagingan sa Evergreen Farm sa may Barangay Datu Abdul, siyudad sa Panabo.

Usa ka molupyo sa nahisgutang barangay ang naangol human natagakan sa eroplano ang iyang balay. (Dondon Dinoy)