USA ka lola nahiagum og mga pangos ug bun-og sa kalawasan human nabanggaan og pedikab didto sa Barangay Magugpo North, dakbayan sa Tagum, Sabado sa gabii.

Nailhan ang biktima nga mao si Salvacion Cortez, 67, ug molupyo sa Seminary Drive, Barangay Magugpo North siyudad sa Tagum.

Updates on President Benigno Aquino III's presidency

Sa report gikan sa Tagum City Police Station nasayran nga pasado alas 7:00 sa gabii, sa dihang mitabok sa dalan ang biktima didto sa maong dapit aksidente matud pa siyang nabanggaan sa usa ka pedikab nga dunay body number 1216 ug gidrayban ni Daryl Ramos.

Nahiagum og mga pangos ug bun-og sa kalawasan ang biktima ug daling gidala sa Bishop Joseph Reagan Hospital.

Migawas sa inisyal nga imbestigasyon sa mga otoridad nga nagdagan ang pedikab gikan sa Curvada, Barangay Magdum, padulong sa may St. Mary's College sa dihang nahitabo ang aksidente.

Ang drayber na mismo sa pedikab maoy naghatud sa biktima ngadto sa ospital.

Mitahan sab sa iyang kaugalingon ngadto sa mga otoridad ang drayber nga si Ramos.

Kapulisan sa siyudad sa Tagum mihimo na og dugang imbestigasyon sa nahisgutang hitabo. (Marvin Pineda)