USA ka drayber sa motorsiklo gidali pagdala sa bay tambalanan human nasungag niini ang kolor itom nga Isuzu XR didto sa dalang Mabini, Barangay Poblacion, lungsod sa Kiblawan, Davao del Sur.

Ang Isuzu XR nagbaton sa plakang LK-9107 ug gimaneho ni Ricky Magallanes, 35, minyo ug taga dalang Lapu-lapu sa lungsod sa Padada.

Updates on President Benigno Aquino III's presidency

Ang motorsiklo nga kolor itom, usa ka Honda TMX nga dunay plate number WB-9927, gimaneho ni Ricardo Ceballos, 43, minyo ug taga Wawa, Tanauan, Batangas City.

Subay sa pakisusi ni Police Officer 2 Alexander Ryan Luy, nagdagan gikan sa sidlakang bahin ang motorsiklo ug padung sa kasadpang bahin ang Isuzu duol sa Kiblawan Bridge.

Kalit nga niliko padung sa tuong bahin sa dalan ang motorsiklo mao nga didto nadasmagan sa Isuzu. Maayong pagkalagpot sa kalsada sa biktima human nalimbuwad ang iyang gisakyan nga motor.

Unang gitabang sa Gregorio Matas District Hospital ang drayber apan girekomendang ibalhin didto sa Davao del Sur Provincial Hospital (DDSPH) tungod sa talandugong kahimtang.

Kagahapon sa buntag, nasayran sa Sun.Star Superbalita, gikan sa Kiblawan Police, nga namatay na ang biktima kay wa na makaabot nga buhi didto sa Southern Philippines Medical Center (SPMC) human gibalhin gikan sa DDSPH.

Nasuta sa mga nag-atimang doktor nga nabali ang ibabaw'ng bahin sa walang bukton sa biktima ug labihan ang pagkabun-og sa iyang ulo nga maoy hinungdan sa iyang kamatayon.

Temporaryong gikostudiya sa kapulisan ang suspek didto sa ilang buhatan. Apan gipahayag ni Luy nga nipatim-aw sa ilang buhatan ang inahan sa biktima, Emilia Ceballos, ug nagkanayon nga di na mopasaka og kaso ang iyang pamilya. (Dondon Dinoy)