BAYNTE sais ka pamilya ang namakwit human sa nahitabong flash flood ug landslide didto sa lungsod sa Sulop, Davao del Sur niadtong Dominggo.

Way puas ang pagbundak sa kusog nga uwan gikan Sabado sa gabii hangtud sa maong adlaw mao nga miawas ang tubig gikan sa bukirang bahin sa Barangay Waterfall sa lugar.

Updates on President Benigno Aquino III's presidency

Gianod sa tubig baha ang mga kabtangan sa katawhan sa lugar banda alas 8:30 ang takna sa buntag niadtong higayona.

Tulo ka mga balay ang nabungkag didto sa Purok 7 sa lugar, samtang ang ubang kabalayan gisudlan og tubig mao nga nadaut ang pipila ka mga kabtangan.

Niawas sab ang tubig sa Purok 7 ug 8 nga nilapos sa national highway hinungdang natanggong ang mga sakyanan nga mopadung sa mga siyudad sa General Santos ug Digos.

Grabeng pagbaha sab ang nasinatian sa Purok 10 sa Barangay Poblacion hinungdan nga nagkapulike ang kapulisan, apil si Mayor Jose Jimmy Sagarino, kinsa niabot aron susihon ang kahimtang sa katawhan.

Niresponde sa dapit ang mga personahe sa Provincial Disaster Coordinating Council (PDCC) aron luwason ang mga pamilyang naapektuhan sa kusog nga pagbaha.

Gipabalhin didto sa municipal gymnasium ang mga pamilyang naapektuhan sa kalamidad. Hinuon, nasuta sa PDCC nga way bisan usa ka kinabuhing nakalas o nasamdan atol sa sa maong hitabo.

Nagpahimagno na ang PDCC ngadto sa katawhan bisan asang bahin sa probinsiya sa pagpangandam ugaling masinati ang way puas nga kusog nga uwan.

Bisan ang Davao del Sur Provincial Police Office (DDSPPO) nagbutyag nga hayan mahitabo ang dakong kadaut sa mga kabtangan ug mga tanom ugaling magpadayon ang pagdaut nga panahon. (Dondon Dinoy)