MAAYO kining nahuna-hunaan ni Provincial Board Member Sun Shimura nga pukawon ang local government units nga gikinahanglan nga hugtanon nilang i-implementar ang Curfew Ordinance sa ilang tagsa-tagsa ka mga LGU. Kadtong wala pay ordinansa gikinahanglan nga mopanday niini. Pero nagtuo ko nga halos tanang LGU dinhi sa lalawigan aduna nay curfew ordinance apan wala lang ma-implementar. Gipakatulog lang kining maong ordinansa.
Makaayo baya kini alang sa mga batan-on mismo og ingon man sa komunidad. Kasagaran sa mga nahilambigit sa mga krimen karon mao ang mga batan-on labi pa kining mga sakop sa gangs. Kining maong mga grupo mikatap na usab sa kalungsuran. Gani mao kini ang naghatag og labad sa ulo sa atong mga awtoridad sama dinhi sa mga urban areas.
Ang hingusog nga kampaniya paghipos kanila panahon sa kagabhi-on maoy usa sa mga maayong paagi nga maminusan ang kriminalidad.
WAGTANGON
Daghang sugyot karon nga wagtangon o i-abolish kining Sangguniang Kabataan (SK) gumikan kay wala na hinoon maghatag og ehemplo ngadto sa mga batan-on. Inay maoy modelo sa kabatan-onan nahimo na hinuon nga instrumento ang mga SK sa binuang sa mga pulitiko. Ang mga pulitiko migamit sa mga batan-on alang sa ilang pulitikanhong interes. Daghang mga SK ang nahilambigit sa immoral. Nangamabdos ang uban.
Panahon sa SK election ug federation elections, ang mga SK mamalit na usab og boto.
Tiaw ba nimo kanang tag-dos mil ang palit. Hinuon, dili daghan kaayo ang paliton kay gamay ra man ang mga batan-on. Dili sama sa regular elections. Pero ang garbo sa mga ginikanan maoy matumbok ani.
Adunay mga adunahan diha nga gustong ma-opisyal ang ilang anak mao nga mogasto gyod.
Ang uban mga pulitiko sab. Bisperas sa election sa federation, ang mga SK members nga mobutar, pangidnapon sa kandidato.
Papuy-on og hotel, pakan-on unya hatagan pa og allowance.
Naay ubang SK chairman wala sa ilang barangay kay atoa mag-eskuwela sa lungsod o dakbayan. Unya sige dawat og honorarium.
MAAYONG TRAINING
Maayo baya nga training ground alang sa mga batan-on kining pag-apil sa SK. Kay dinhi man god maba-id ang abilidad sa mga batan-on aron maoy magamit nila kon moabot na sila sa ilang insaktong pangidaron. Mamahimo silang matured. Kay dili baya na lalim nga magdala ka og mga miyembro nga nagkalainlaing batasan.
Kon usa ka batan-on ma-expose sa governance mamahimong epektibo siya nga lider sa umaabot nga adlaw. Kay matod pa sa atong nasudnong bayani nga si Dr. Jose Rizal; “Ang nga batan-on maoy paglaum sa atong nasud.”
(bgnalzaro@gmanetwork.com)