HUGTANONG gipanghimakak sa apohan sa 6-anyos nga batang lalake nga giingong gikulata sa iyang amahan ang mga pasangil nga gibato ngadto sa iyang anak nga gibalhog na sa Cebu City Jail.

Samtang ang silingan sa bata kinsa giingong nakasaksi sa hitabo niingon nga igo lang giwiktan sa amahan og t-shirt ang bata sa kapungot nga wa motubag sa dihang gipangita niadtong Agosto 5 sa buntag sa Barangay Basak San Nicolas, dakbayan sa Sugbo.

Updates on President Benigno Aquino III's presidency

Ang inahan sa suspek nga si Rito (tinuod nga ngalan gipugngan) uban sa ilang silingan nga si Andy Dave Muñasque niduaw sa Sun.Star Superbalita aron sa pagpadayag sa ilang habig may labot sa hitabo sa giingong pagpangulata ni Rito sa iyang 6-anyos nga anak.

Nakahilak nga nisaysay si Ginang Vicky sa nasinati sa iyang anak nga gibalhug na sa city jail sa kasong kalapasan sa R.A. 7610 kun Anti-Child Abuse Act human gipasanginlan nga nikulata sa iyang anak.

Asoy ni Vicky nga nangita si Rito sa iyang anak niadtong higayona aron pakan-on og pamahaw ug kaliguon sa di pa motambong sa iyang trabaho isip welder.

Ang biktima wa motubag nga diha sa balay sa iyang iyaan (igsuon sa mama sa bata) nga nagkaon.

Gipapauli ni Rito ang iyang anak apan wa kini bunlota ingon man gibundak samtang kini gikugos ug giingong giparok ang ulo lakip na ang pagsagpa sigun sa unang natala niining mantalaan (guwa Agusto 12).

Samtang si Muñasque nisaysay nga iya rang nakita nga igo lang giwiktan sa t-shirt ang bata.

Gani wa kini mohilak dungan sa pag-ingon “sayo pa sa buntag, naglaag-laag naka,” kasaba sa amahan ngadto sa bata.

Apan sa kakugang ni Rito kay dihang nagbitbit na siya sa iyang hiraminta paingon sa trabahoan, gisugat siya sa mga sakop sa Department of Social Welfare and Development (DSWD) dayon gidala sa Police Station 11 sa Cebu City Police Office (CCPO) kay gidakop tungod sa giingong pagkulata niya sa iyang anak.