USA ang patay, upat ang nangaangol, usa kanila nga seaman nakaangkon og grabing kadaot sa kalawasan human ang ilang awto nga gisakyan nabangga sa usa ka punoan sa lubi dayon nabalitok sa national highway sa Brgy. Bagacay, lungsod sa Sibonga, Sugbo.

Si Rigo Rizada, 40, usa ka American citizen ug seaman, temporayong nagpuyo sa nahisgutang lugar, putlanan sa tiil samtang si Lemuel Ibo, 42, kanhi kapitan sa nahisgutang barangay, nakaangkon og grabing samad sa nawong.

Updates on President Benigno Aquino III's presidency

Laing mga biktima giilang mao sila si Crisologo Dakay, 50, minyo , ug usa ka Danny Rubia, ulitawo, 19, taga Brgy. Poblacion, Argao, Sugbo.

Si PO2 Ederlino Bacosco sa Sibonga Police Station nga nahinabi sa Sun.Star Superbalita nagkanayon nga ang biktima namatay nga si Danny Rubia namatay sa tambalanan tungod sa grabing kadaot sa ulo.

Si Rubia naglingkod sa front seat.

Si PO2 Bacosmo nagkanayon nga gikan sa Poblacion, Sibonga ang mga biktima nga nanuroy.

Giingong gisakyan niini ang awto nga Honda Civic (GTJ-818) nga gimaniho ni Rizada.

Kusog kining nagdagan hinungdan nga sa pag-abot sa nahisgutang lugar wa na makakontrolar sa manobela si Rizada, nibangga kini sa punoan sa lubi ug tungod sa kakusog sa impact, nabalitok ang awto.

Matod pa ni Bacosmo nga gumikan sa kakusog sa impact, si Rizada nilapos sa bintana sa atubangan sa awto ug nalagpot pipila ka metros ang gilay-on.

Sumala pa ni Bacosmo, nga gumikan sa kakusog sa dagan, maayong pagka-gusbat sa awto ug wa na mahitsura.

Gani dihang nilupad kini pagkabangga sa lubi dayon nibalitok pa ug didto motugpa sa usa ka waiting shed.

Gipadayag niini nga posibling naka-inom ang mga biktima gikan naglaag niadtong higayuna.

Ang mga biktima gidali sa pagdala sa tambalan dinhi sa dakbayan sa Sugbo gumikan sa grabing kadaot sa ilang ulo, ug kalawasan.(Guam P. Logroño)