DUHA ang patay sa gipahigayong disco sa fiesta sa managlahing mga dapit sa lalawigan sa Sugbo niadtong Dominggo.

Si Helen Pascual, 42, minyo, tigbaligya og barbecue, taga Sitio Ubos, Brgy. Cabung-an, lungsod sa San Francisco, Camotes, dead-on-arrival sa tambalanan human makaangkon og samad sa ubos sa tuong abaga sa bala gikan sa wa matinong armas.

Updates on President Benigno Aquino III's presidency

Sa report sa San Francisco Police Station, si Pascual namaligya og barbecue sa nahisgutang lugar sa ilang fiesta dihang dunay kagubot nga nahitabo sa mga nag-disco sa maong lugar.

Si brgy. tanod Rogelio Otida, 39,alias Wiwi, minyo, kinsa duty niadtong higyuna, daling nilanit sa iyang gidalang armas nga .38 kalibre nga rebolber.

Usa ka wa mailhing tawo ang kalit lang niilog sa iyang armas nga niresulta sa ilang pag-inilugay hinungdan nga nibuto ug naigo ang biktima.

Si PO1 Mamerod Caracena, desk officer sa San Francisco Police Station nagkanayon nga human sa insedenti si Otida daling nitahan sa kapulisan.

Ang armas uban sa upat ka mga bala narekober sa kapulisan sa usa ibabaw sa usa ka lubi nga sanggutan.

Tukmang kaso ang gihikay sa kapulisan sa Camotes batok kang Otida.

Samtang niadtong Dominggo sa kaadlawon, usa ka 48-anyos gipusil patay sa Sitio Metan-agan, Brgy. New Bago, lungsod sa Asturias.

Si Dominador Atis, 48, minyo, taga Sitio Sta. Rita, lungsod sa Asturias, gipusil sa iyang gikainom nga si Edwin Pintor, 23, ulitawo, nagpuyo sa nahisgutang barangay.

Sa imbestigasyon sa kapulisan sa Aturias, ang biktima ug suspek nag-inom atol sa disko.

Dihang nagkalami na ang ilang pang-inom, kalit lang nag-wild ang suspek nga nagbitbit sa iyang armas sulod sa diskuhan.

Gibadlong siya sa biktima ug gidala sa gawas sa diskohan ug nisuway sa pag -ilog sa armas aron unta dis-armahan ang suspek.

Apan napakyas ang biktima. Ang suspek nasuko pag maayo sa biktima ug gipusil siya makaduha ka mga higayon sa gidala niining .45 kalibre nga armas ug namatay diha-diha.

Human sa pagpamusil, ang suspek daling nisibat.Ang kapulisan nakarekuber sa crime scene sa duha ka mga bala sa kalibre .45 ug usa ka kabhang niini. (Guam P. Logroño)