SAMDAN sa iyang walang sampot ang usa ka pulis sa dakbayan sa Sugbo human maunay sa iyang armas de fuego pasado alas 10 ang takna sa milabayng gabii sulod sa iyang balay.
Ang biktima nga gidala sa Perpetual Succour Hospital giilang mao si PO2 Rommel Mediodia, 38, taga St. Joseph st., Barangay Hipodromo, dakbayan sa Sugbo.
Si Mediodia naigo sa iyang armas nga kalibre .38 nga rebolber.
Nadestino siya sa Mobile Patrol Group sa Cebu City Police Office (CCPO).
Si SPO3 Rey Cuyos sa Homicide Section nagkanayon nga subay sa ilang imbestigasyon, paingon na unta matulog si Mediodia sa dihang nagbitbit sa iyang armas nga aksidente nga nahulog.
Pagtugpa sa sawog sa iyang armas, nibuto kini.
Ang iyang asawa nga diha sa pagkahitabo daling nidala sa biktima sa tambalanan ug luwas na sa delikado nga kahimtang.
Matod pa ni Cuyos nga di na sila mohimo pa og dugang imbestigasyon sa maong hitabo human nialigar ang pulis nga aksidente nga nahulog ang iyang armas ug nakabuto.
Mohimo sila og imbestigasyon kon adunay laing motomaw nga aligasyon, kabahin sa maong hitabo.
Iya sab nga gisalikway ang mga pagduda nga nagkaaway sila si Mediodia ug asawa kay mao pa gani kiniy nidala sa pulis sa tambalanan.
Na-recover sa kapulisan ang usa ka slug ug lima ka mga bala sa pusil sa dapit nga nahitaboan.
Matod ni Cuyos nga gamay ra ang samad sa pulis.