NAKAANGKON og bun-og sa kalawasan ang suspetsado human nga gikulata sa mga estambay kinsa nitabang sa pagsikop human nga gibira ug gitulis ang menor de edad sa Barangay 40 ning dakbayan sa Cagayan de Oro.
Ang suspek nga si Raymond Baring, 21, ulitawo, lumad sa San Miguel, Manolo Fortich, Bukidnon apan walay pernamenteng address dinhi sa dakbayan.
Sa nahipos nga impormasiyon gikabutyag nga samtang nagbaklay ang 16-anyos nga babaye sa nahisgutang dapit gisundan matud pa kini ni Baring.
Giingong kalit lamang nga gibira ang kwelyo niini ug giti-onan sa mahait nga hinagiban ug mideklara og tulis.
Nahadlok ang biktima apan nakapangayo pa kini og tabang hinungdan nga giguyod kini sa suspek mao nga nakaangkon og gasgas lakip na bun-og sa iyang siko apan swerteng namatikdan kini sa lumulupyo sa maong dapit lakip na sa mga estambay hinungdan nga gigukod ang biktima ug gikulata.
Nakaangkon og bun-og lakip na mga samad ang suspek human gitabangan sa pagkulata sa mga nigukod kaniya ug dali usab kining gidala sa estasiyon sa kapolisan.
Sa pagkakaron, nagtingkagol na ang suspek sulod sa mini-cell sa Cogon Police Station.