MATUD pa sa panultihon, moabot ang panahon sa kalibutan nga magkaharong ang sakop sa pamilya. Nasud batok nasud. Ginikanan batok anak. Igsuon batok igsuon; mata sa mata ug ngipon sa ngipon. Ang kusgan magmadaugon samtang ang huyang magpahipi sa daplin.

Ang atong nasud nahisama usab sa usa ka pamilya diin may daghang problemang gisagubang. Ang unang banay sa pangulo ang amahan samtang ang iyang mga gabinete ug ahensiya sa gobyerno mao ang iyang mga suluguon.

Updates on President Benigno Aquino III's presidency

Gawas sa kakabus, may mga suluguon ug mga anak siya nga masupilon. Bag-o lang nga natukod kining maong pamilya nga sama sa kagamhanan karon ni P-Noy nga nagpanday pa sa iyang pinuy-anan.

Apan unsa bang hitaboa nga inay iyang iplastar ang tanan, nisuki na man hinuon ang pipila niya ka mga suluguon ug gibatikos pa sa iyang silingan nga wa makaangay sa iyang gibuhat.

Ang una pa lang niyang Executive Order (EO) nahimo nang sentro sa batikos sa media kay may sabit. Gisundan pa kini sa EOs 2 ug 3 nga nisamot pa pagka-controversial kay daghan mang suluguon nga kanhi gamhanan nga maigo. Mora ba'g nangandam nang daan og latigo ang mga suluguon nga nanggungis na sa puwesto nga ibunal nila sa amahan sa matag lihok niya.

Matud pa sa mga petisyoner nga unconstitutional ang maong mga sugo gikan sa pangulo ug nilapas sa iyang awtoridad nga ehekutibo. Gitawag pa kining maong lakang ni P-Noy sa usa ka petitioner nga "nagkaluhang palisiya sa kalagot ug panimalos" kay gitangtang sila sa puwesto nga way basihanan. Ang EO 2 nagmando sa pagbaliwala sa gipangtudlo nga kawani ni kanhi PGMA sa panahon sa 2010 nga piniliay samtang ang EO 3 nagbasura sa EO 883 nga gi-isyu ni PGMA niadtong Mayo 28, 2010 o usa ka bulan una molingkod ang sunod nga presidente. Ang EO 883 naghatag og pagtugot sa Career Executive Service Board nga mosangon og ranggo nga career executive service officer (CESO) III sama sa ranggo sa regional director ngadto sa mga abogado nga naghupot og legal nga posisyon sa gobyerno.

Mokabat og 977 ka nga "midnight appointees" ni GMA ang makabenepisyo sa EO 883. Nagpangalot karon ang mga abogado sa bag-ong kagamhanan kung unsaon kini pagharong kay mga abogado de campanilla sab ang ilang kontra.

Sa laing bahin, matud pa ni DOJ secretary Leila de Lima nga best friend ni RRD nga ang EO 883 nga niguwa human sa kapildihan sa mga kandidato sa daang administrasyon usa ka "klarong pagsulay sa pag-abuso ug pagliko sa balaod kabahin sa career officers."

Gipaburan sab niya ang lakang ni P-Noy dungan sa pag-ingon nga dapat hinumduman sa tanang nagtrabaho sa gobyerno ang constitutional principle nga ang "public office is a public trust" ug ang "government service is a privilege and not a right." Dugang pa niya nga andam og tagana ang iyang buhatan sa pagharong sa asunto kabahin niini sa Korte Suprema.

Para kanako di makatarunganon ang gibuhat ni kanhi PGMA ug angayan lang nga repasuhon kini sa bag-ong administrasyon bisan kon daghan ang maglagot.