Editoryal: 12 maayo ba itandi sa 10?

GIPLANO karon sa administrasyon ni Presidenti Benigno Simeon C. Aquino III nga himuong 12 ka tuig ang pagtungha sa mga bata sa elementarya ug high school. Sa laktud, duha ka tuig ang ipuno sa naandang napulo ka tuig nga pagtungha.

Ang rason sa administrasyon mao nga palambuon pa ang kalidad sa edukasyon. Pinaagi sa maayong kalidad sa edukasyon, mga gradwado dili mabintahan, bisan sa mga langyawng nasud sa pagpang-apply og trabaho. Sakto ni nga argumento.

Apan mutuo kaha ang katawhan nga ang 12 anyos nga pagtungha maayo?

Kining butanga maayo gyud tun-an pa sa kagamhanan, ilabi na sa Department of Education (DepEd) ug dili magpaturagas.

Primero, angay hunahunaon og maayo ang dugang galastuhan sa mga ginikanan kinsa daan na nagbaguod sa kalisud sa pagpatungha sa ilang mga anak.

Dili kaha kini mosangko unya sa labaw'ng pagdaghan sa mga magtutungha nga mapugos sa pag-undang tungod kay di na kalahutay sa galastuhan ang ilang mga ginikanan?

Gawas niini, andam na ba ang nasudnong kagamhanan sa pagtukod og dugang mga classrooms, pagpabuhat og daghang lingkoranan ug pagpalit og mga libro?

Sa pagka-karon, nagdasok na ang mga bata sud sa mga lawak-tunghaan tungod kay matag tuig mousbaw ang gidaghanon sa mga batang magtutungha samtang ang mga classrooms mapun-an tuod apan dili paigo.

Sukad kita nakamatngon og buot, gi-problema na sa atong mga tunghaan kining kakuwang sa classroom ug hangtud karon nga naniguwang na kita nagpabilin kini nga suliran nga wa nasulbad sa gobyerno.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph