USA ka tawo ang namatay human siya nabanggaan sa usa ka pick-up samtang nagmaneho siya sa iyang motorsiklo sa alas 11:45 sa gabii niadtong Lunes didto sa Barangay Binugao, siyudad sa Davao.
Si PO2 Jessie Plaza sa Toril Police Statio nag-ila sa biktima nga mao si Dinnes Dou, 27, ug nagpuyo sa Astorga, Sta. Cruz, Davao del Sur.
Matud ni Plaza nga nagsubay ang biktima sa Mc Athur Highway apan nabanggaan siya sa usa ka Toyota Hilux nga dunay plate number LFG-569 ug gimaneho ni Ryan Fernandez, nagpuyo sa Estrada Subdivision, Digos City.
Si Dou daling gidala sa Mediquest Hospital sa Toril apan gideklara sa mga doctor nga patay na siya dihang miabot sa tambalanan.
Mga traffic investigators sa Toril Police Station padayong nagsusi sa maong hitabo aron sayron kung unsa ang hinungdan nganong nabanggaan ang biktima.
Sa laing bahin, usa ka accounting clerk ang midangat sa tambalanan human siya gidunggab sa alas 11:30 sa gabii niadtong Lunes.
Ang biktima mao si Pablo Jenoso Jr., 27, ulitawo ug nagpuyo sa 813 Ruby St. Pag-ibig Heights, Catalunan Grande, siyudad sa Davao.
Si Jenoso daling gidala sa San Pedro Hosptal human siya gidunggab ni Jannimar Canoy, 23, ulitawo ug nagpuyo sa Del Pilar Street, Jerome Extension, R. Castillo, Agdao.
Base sa imbestigasyon sa Sta. Ana Police Station, ang biktima namisita sa balay sa iyang girlfriend nga si Jasmine Padera apan kalit siyang gidunggab ni Canoy.
Ang suspek, human sa hitabo, daling miikyas sa maong dapit mao nga gipangita siya sa kapulisan. (AD)