NIABOT na sa 29 ang gidaghanon ka mga pamilya nga apektado sa nahitabong pagbaha niadtong Dominggo didto sa Sulop, Davao del Sur ug milyon ang nahimong danyos.

Ang Barangay Poblacion sa maong lugar maoy labing apektado ug lima ka purok ang nagpabilin pang naglutaw sa tubig nga niawas gikan sa bukirang bahin sa Barangay Warefalls.

Updates on President Benigno Aquino III's presidency

Si Juanita Toong, nga ang bay gilampurnas og baha, nagbutyag nga lampas tuhod ang giladmon sa tubig nga nisulod sa ilang tugkaran. Naguba sab ang iyang negusyong bingkahan nga gimuntar kilid sa national highway.

"Karon gyud ang pinaka-worst nga baha sa among kasinatian. Pati among panginabuhian nawala," niya pa.

Ang Phoenix Gasoline Station gisulod sab og tubig nga niresulta sa pagkaguba sa usa nila ka makina ug naanod ang mga gamit sama sa refrigerator.

Si Christy Brandares, Phoenix area manager, nagsulti nga labihan gyud kakusog ang bul-og sa tubig niadtong higayona.

Apektado sab ang klase sa Sulop National High School human subling gilunupan ang ilang tunghaan.

Ang 80 anyos nga si Floro Fullion nibakho sanglit naglisod sila sa pagbakwit kay dili makalakaw ang asawang si Caridad.

Giasikaso na sa lokal nga gobyerno ang mga biktima sa baha. Gibana-banang di moubos sa milyon ang danyos sa baha.

Matod sa katawhan nga naandan na nila ang pagbaha sa lugar. Apan ang pagbaha niadtong Dominggo mao ang labing dako nga ilang nasinatian.

Nanghinaut karon ang mga biktima nga gilayong matukod ang naanod nilang balay dungan sa panawagan nga maundang na ang illegal logging sa bukid nga gituohang hinungdan sa kalamidad. (Orlando B. Dinoy)