DUHA ka mga drayber nangaangol, usa kanila anaa sa talandugon nga kahimtang, human nagbangga ang ilang gisakyan nga motorsiklo ug traysikel didto sa national highway sa Barangay Southern Paligue, lungsod sa Padada, Davao del Sur.

Ang traysikel nga Kawasaki, nagbaton sa plakang XF-6434, gimaneho ni Danilo Flores, minyo, 53, ug lumolupyo sa Purok 3 sa maong lugar. Ang motor nga Honda nga dunay bulok nga itom ug plate number nga LF-6817, gimaneho ni Jhunar Hagonoy, 20, ug lumolupyo sa Purok Sunflower, dalang Mabini Extension, siyudad sa Digos.

Updates on President Benigno Aquino III's presidency

Subay sa imbestigasyon sa traffic section sa Padada Police, nga banda alas 8:10 sa miaging gabii, pulos nagdagan ang duha ka mga sakyanan didto sa Digos-Makar Road sa dihang nahitabo ang panagbangga.

Giasoy ni Police Officer 1 Ramil Locostales gikan sa amihanan ang traysikel samtang sa habagatan gikan ang motorsiklo. Apan pag-abot sa nahisgutang lugar nahitabo ang pagsungag sa duruha.

Nilagpot ang drayber sa motorsiklo samtang samaron sab ang drayber sa traysikel gumikan sa kakusog sa impak sa ilang pagbangga.

Pulos gitabang ug gidala sa managlahing balay tambalanan ang duha ka mga drayber. Ang drayber sa traysikel gidala sa Digos Doctors Hospital ug matod ni Dr. Francis Malilong anaa sa "commatose" nga kahimtang. Samtang gisud sab sa Sunga Hospital ang drayber sa motorsiklo, kinsa gitataw ni Dr. Carla Joy Aboyo, nga nahiagom og "multiple injury."

Sumala ni Lacostales, pulos naguba ang duha ka mga sakyanan tungod sa kakusog sa bangga.

Gi-obserbahan pa sa mga doktor ang kahimtang sa duha ka mga drayber mao nga gihuwat sa kapulisan ang resulta sa imbestigasyon aron masuta kon kinsay sad-an sa maong hitabo. (Dondon Dinoy)