LIMA ka tawo ang samaron human nibangga ang usa ka de-pasaherong dyip ngadto sa usa ka trak de karga didto sa Lauro Arabejo Avenue ug Mariano Fuentes Avenue, Barangay Poblacion, lungsod sa Nabunturan, Dominggo sa buntag.
Sa nahagpat nga report gikan sa Comval Province Police Provincial Office kagahapon, nasayran nga nahitabo ang disgrasya pasado alas 5:00 sa buntag, nagdagan ang usa ka de-pasaherong dyip nga dunay plate number LFH-554 nga gidrayban sa usa ka Bryan Baroma ug molupyo sa Barangay Pisaan, lungsod sa San Francisco, Agusan del Sur.
Gikataho nga gikan pa sa Purok 2 Barangay Poblacion padulong unta sa Barangay Sta. Maria, lungsod sa Nabunturan ang dyip.
Pag-abot sa maong dapit, mibangga ang dyip sa gikasugat nga trak de karga nga dunay plate number GMU-502 ug gidrayban sa usa ka Dennis Borres, ug molupyo sa Purok Barangay Poblacion, lungsod sa Monkayo.
Tungod sa kusog nga impak, nahiagum og mga pangos ug bun-og sa kalawasan ang mga pasaherong sakay sa dyip nga sila Robert Agad, William Pilapil, Luth Pilapil, Bernie Batoma lakip ang drayber sa dyip nga si Baroma.
Gipangdala sa Nabunturan Doctor's Hospital ang mga samaron samtang ang drayber sa trak de karga mitahan sa iyang kaugalingon ngadto sa mga otoridad.
Ang duha ka mga sakyanan nga nalambigit sa disgrasya gikostudiya sa kapulisan, samtang mga sakop sa Nabuturan Municipal Police Station mihimo na og dugang imbestigasyon sa hitabo. (Marvin Pineda)