USA ka sundalo ug tulo ka sibilyan ang namatay samtang laing duha pa ang naangol sa dihang nadisgrasya ang ilang gisakyan sa alas 3:00 sa hapon niadtong Lunes didto sa Barangay Dalwangan, siyudad sa Malaybalay, Bukidnon.
Giila sa kapulisan ang mga namatay nga sila si Corporal Cirilo Satur nga nadestino sa 8th Infantry Battalion sa Philippine Army, Roy Roxas nga taga Bukidnon, Henry Keder nga taga Misamis Oriental, ug usa ka Albert Luspo.
Mga naangol nailhan nga sila si Nico Mahumay ug Anthony Aboy.
Matud ni Ronilo Cebales, kinsa usa sa mga nakasaksi sa aksidente, nga kusog kaayo ang dagan sa Mitsubishi Jeep nga dunay plakang KDJ 934 nga gisakyan sa mga biktima nga gikan sa siyudad sa Cagayan de Oro.
Pag-abot nila sa kurbada nga bahin sa Barangay Dalwangan, kalit mibuto ang ligid sa unahan sa maong sakyanan hinungdan nga wala na mokontrola sa drayber ang manobela ug ka-upat nabalintong ang sakyanan.
Patay gilayon ang upat ka mga biktima samtang ang duha ka mga samaron gidala sa nagpakabana nga mga molupyo sa Malaybalay City Hospital.
Mga samdan pulos anaa sa grabeng kahimtang gumikan sa daghang mga bali, pangos ug samad sa nagkadaiyang bahin sa ilang kalawasan.
Ang kuwerpo sa kapulisan sa siyudad sa Malaybalay padayong nag-imbestigar sa maong hitabo. (Edgardo Fuerzas)